கிறிஸ்துவுக்குள் பிரியமுள்ள வாசகர்களுக்கு,

ஆண்டவரும் மீட்பருமாகிய இயேசுகிறிஸ்துவின் இனிய நாமத்தில் வாசகர்கள் அனைவருக்கும் வாழ்த்துக்களைத் தெரிவிக்கிறோம். இவ்விதழின் வாயிலாக தங்களை சந்திப்பதில் மிக்க மகிழ்ச்சியடைகிறோம். சத்தியவசன தியானநூல் அநேகரது ஆவிக்குரிய வாழ்க்கைக்கு பிரயோஜனமாய் இருப்பதை அறிந்து தேவனை ஸ்தோத்திரிக்கிறோம். தியானங்களின் மூலம் பெற்றுவரும் ஆசீர்வாத அனுபவங்களை கர்த்தருடைய நாம மகிமைக்காக எங்களுக்கு தெரிவிக்க அன்பாய் கேட்கிறோம்.

கடந்த இதழில் அறிவித்திருந்தபடி ஜுலை 16,17 ஆகிய இரண்டு நாட்களில் சென்னையில் Pastors & Partners Equip Conference மிகவும் ஆசீர்வாதமாக நடைபெற்றது. பங்காளர்கள் அநேகர் கலந்துகொண்டனர். நன்றி கூறுகிறோம். இந்த கருத்தரங்கில் பயன்படுத்திய கருத்தரங்கின் மையப்பொருளான திருச்சபை மற்றும் அதின் பணிகள் குறித்த விளக்கங்கள் அடங்கிய கையேடு விநியோகத்திற்கு உள்ளது. தேவைப்படும் பங்காளர்கள் எங்களுக்கு எழுதி இலவசமாகப் பெற்றுக்கொள்ளலாம்.

சத்தியவசன தொலைக்காட்சி, இலக்கியபணி வாயிலாகவும், இணையதளம், வாட்ஸ் அப், YouTube ஆகிய ஊடகங்கள் வாயிலாக அனுதினமும் மக்களுக்கு தேவனுடைய வார்த்தைகளைப் போதிக்க தேவன் கிருபைசெய்து வருகிறார். இவ்வூழியங்கள் மூலம் பல்லாயிரக்கணக்கான மக்கள் சத்தியத்தை அறியவும் ஜீவனுள்ள தேவனண்டைக்கு வழிநடத்தப்படவும் வேண்டுதல் செய்கிறோம். இவ்வூழியத்தின் தேவைகள் அனைத்தும் சந்திக்கப்பட தாங்கள் இணைக்கரம் கொடுத்து உதவ அன்பாய் கேட்கிறோம். தங்கள் ஆவிக்குரிய நண்பர்கள் விசுவாசிகளுக்கும் தியான நூலை அறிமுகம் செய்துவையுங்கள்.

இவ்விதழில் செப்டம்பர் மற்றும் அக்டோபர் ஆகிய இரண்டு மாதத்திலும் தானியேல் புத்தகத்திலிருந்து அநேக சத்தியங்களை நாம் கற்றுக்கொள்ளும்படியாக சகோதரி சாந்தி பொன்னு அவர்கள் தியானங்களை எழுதியுள்ளார்கள். தியானங்களை எழுதும் சகோதர சகோதரிகளை உங்கள் ஜெபங்களில் தாங்க அன்பாய் கேட்கிறோம்.

கே.ப.ஆபிரகாம்

அதிகாலை வேளையில்… (செப்டம்பர் – அக்டோபர் 2024)
Dr.W.வாரன் வியர்ஸ்பி

வேதபகுதி: எஸ்றா 3 :1-13

கி.மு.538இல் பாபிலோனுக்குச் சிறைபட்டுச்சென்ற சுமார் ஐம்பதாயிரம் யூதர்கள் எருசலேம் தேவாலயத்தைத் திரும்பக்கட்டவும் நகரத்தை மீட்டுப் புதுப்பிக்கவும் திரும்பினர். அவர்களுக்கு வாழ்க்கை எளிதாக இல்லை; ஏனெனில் நகரம் பாழாகியிருந்தது, மேலும் எருசலேம் புதுப்பிக்கப்படுவதை இஸ்ரவேலின் எதிரிகள் விரும்பவில்லை. ஆனால், யூதர்கள் ஒன்றுபட்ட மக்களாக இருந்தனர் (எஸ்றா 3:1,9). கர்த்தரும் அவர்களுடன் இருந்தார். அவர்களின் முன்னுரிமைகள் சரியாக இருந்தன. ஆலயம் கட்டுமுன் பலிபீடத்தைக் கட்டியெடுத்து தேவனுக்கு அன்றாட பலிகளைச் செலுத்தத் தொடங்கினர்.

இங்கு ஒரு புதிய தலைமுறை ஒரு தேசமாக ஒரு புதிய ஆரம்பத்தை உருவாக்கியது. ஆனால் அவர்கள் புதிதாக எதையும் கண்டுபிடிக்கவில்லை; பண்டைய மோசேயின் பிரமாணத்தின் வழிமுறைகளுக்கும் தேவனின் வார்த்தைக்கும் கீழ்ப்படிந்தனர். இன்றும் சில விசுவாசிகள் இவர்களது முன்மாதிரியைப் பின்பற்றவேண்டும்.

நமக்கு ஒரு பலிபீடம் உண்டு. அது பூமியிலுள்ள ஆலயத்தின் முன் அல்ல, மாறாக, பரலோக சிங்காசனத்தின் முன் இருக்கிறது. பரத்துக்கு ஏறியவரும் மகிமைப்படுத்தப்பட்ட தேவகுமாரனே நமது பலிபீடம் (எபி.13:10). அவர் மூலமாகவே நாம் ஆவிக்கேற்ற பலிகளை தேவனுக்குச் செலுத்துகிறோம் (1பேதுரு 2:5). “திருச்சந்நிதானத்துக்கு வந்து இறைவனைச் சந்தியுங்கள்” என்று பிரசங்கிகள் சொல்வதை நான் கேட்டிருக்கிறேன். ஆனால், பூமியில் அவ்வித பலிபீடங்கள் எங்கும் இல்லை. இயேசுகிறிஸ்து பரலோகத்திரை வழியாக மகாபரிசுத்த ஸ்தலத்திற்குச் சென்று, அங்கிருந்து அவர் நமக்காகப் பரிந்து பேசுகிறார் (எபி.6:20). பழைய ஏற்பாட்டில் ஆசரிப்புக்கூடாரத்தின் வாசலில் இருந்த வெண்கல பலிபீடத்தில் தேவன் தம் மக்களைச் சந்தித்துவந்தார் (யாத்.29:42,43, 38:30). ஆனால், இன்று நாம் குமாரன் மூலமாகவும் (யோவான் 14:6) ஆவியானவர் மூலமாகவும் பிதாவினிடத்தில் வருகிறோம் (எபே.2:18). எபிரெயர் 4:14-16ன்படி நாம் தைரியமாகவும் “பேச்சு சுதந்திரத்துடன்” கிருபையின் சிங்காசனத்திற்கு வரலாம். நமது ஆராதனைகளின் பலிகள் மூலமாக நம்முடைய தேவைகளைத் தெரியப்படுத்த முடியும்.

இயேசுகிறிஸ்துவை விசுவாசிக்கும் ஒவ்வொருவரும் ஓர் ஆசாரியரே! (1 பேதுரு 2:5,9; வெளி.1:6) தேவனை ஆராதிப்பதற்கும் ஊழியம் செய்வதற்கும், “ஆன்மீக பலிகளைக்” கொண்டு வருவதற்கும் நமக்கு உரிமை உள்ளது.

“ஆன்மீகம்” என்ற சொல் பொருளற்றதல்ல; மாறாக, அது தேவன் ஏற்றுக்கொள்ளக்கூடிய ஒரு ஆன்மீகப் பண்பாகும். ஒவ்வொரு நாளின் தொடக்கத்திலும் என் சரீரத்தை நான் ஜீவபலியாக தேவனுக்கு சமர்ப்பிக்கவேண்டும் (ரோமர் 12:1-2). மேலும், விண்ணப்பம் செய்யவும் (சங்.141:1-3), துதிகளை ஏறெடுக்கவும் (எபி.13:15) நேரம் ஒதுக்கவேண்டும். பகலில் அவரை கனப்படுத்தும் நற்காரியங்களைச் செய்யவும் (வச.16), நம்முடைய பொருள் வளங்களைப் பயன்படுத்தி மற்றவர்களுக்கு உதவும் நற்காரியங்களைச் செய்யவேண்டும் (பிலி.4:14-18; ரோமர் 15:27).

சபை மக்கள் ஒன்று கூடிவரும்பொழுது அது ஆன்மீகப் பலிகளைச் செலுத்தும் ஒரு “ஆசாரியர்களின் ராஜ்யம்” ஆகும். ஆண்டவரை மகிழ்வித்து மகிமைப்படுத்துவதே நமது விருப்பம். அவருக்கு சிறந்த காணிக்கைகளைக் கொண்டு வரவேண்டும். மலிவான பலிகளைக் கொண்டுவந்ததற்காக ஆசாரியர்களை மல்கியா தீர்க்கதரிசி கண்டிக்கிறார். ஒர்னானிடமிருந்த களத்தை வாங்கியபொழுது “நிச்சயமாக நான் அதை முழுகிரயத்துக்கு வாங்குவேன். நான் உன்னுடையதை இலவசமாய் வாங்கி, கர்த்தருக்குச் சர்வாங்க தகனத்தைப் பலியிடமாட்டேன்” (1 நாளா.21:24) என்று தாவீது சொன்ன வார்த்தைகள் நினைவுக்கு வருகின்றன. நாம் எதைக் கொடுக்கிறோம், எப்படிக் கொடுக்கிறோம் என்பவை தேவனுக்கு நாம் கொடுக்கும் மதிப்பினை வெளிப்படுத்துகிறது. ஆராதனை என்ற சொல்லின் பொருள் “மதிப்பு” என்பதாகும்.

நீங்கள் எதிர்பார்க்கும் திட்டம் எதுவாக இருந்தாலும் முதலில் பலிபீடத்தை உரு வாக்குவதை உறுதிப்படுத்தவேண்டும். நம்மையும் நம்மிடம் உள்ளதையும் கர்த்தருக்குக் கொடுக்கவேண்டும். இலவசமாகப் பெற்றதை அவருக்குக் கொடுக்கவேண்டாம். உங்களுக்கு தேவையற்றதை அவருக்குத் தரவேண்டாம்.

“நீங்கள் கண் ஊனமானதைப் பலியிடக்கொண்டுவந்தாலும் அது பொல்லாப்பல்ல, நீங்கள் காலூனமானதையும் நசல் பிடித்ததையும் கொண்டுவந்தாலும் அது பொல்லாப்பல்ல என்கிறீர்களே; … அவர் உங்களை அங்கீகரிப்பாரோ என்று சேனைகளின் கர்த்தர் கேட்கிறார்” (மல்கியா 1:8-9).

மொழியாக்கம்: Sis.அகஸ்டா மங்களதுரை

வேதாகமத்தின் தனிச்சிறப்பு (செப்டம்பர் – அக்டோபர் 2024)
Dr.உட்ரோ குரோல்

தம்முடைய வார்த்தை எழுதப்படும் போது தேவாவியானவர் எழுதுபவர்களின் உள்ளத்திலிருந்து எழுதத் தூண்டிக்கொண்டிருந்தார். அந்த எழுத்தாளர்கள் எழுதினர். எழுதும்படி பொருளைத் தூண்டிக்கொண்டிருந்தவர் தேவஆவியானவரே!

வேதவாக்கியங்களெல்லாம் தேவ ஆவியினால் அருளப்பட்டிருக்கிறது; தேவனுடைய மனுஷன் தேறினவனாகவும், எந்த நற்கிரியையுஞ் செய்யத் தகுதியுள்ளவனாகவும் இருக்கும்படியாக, அவைகள் உபதேசத்துக்கும், கடிந்து கொள்ளுதலுக்கும், சீர்திருத்தலுக்கும், நீதியைப் படிப்பிக்குதலுக்கும் பிரயோஜனமுள்ளவைகளாயிருக்கிறது (2தீமோ. 3:16,17).

எரேமியா தீர்க்கதரிசி இப்படி எழுதியிருக்கிறார். நான் உன்னை அனுப்புகிற எல்லாரிடத்திலும் நீ போய், நான் உனக்குக் கட்டளையிடுகிறவைகளையெல்லாம் நீ பேசுவாயாக (எரே.1:7.). கர்த்தருடைய ஆவியானவர் என்னைக் கொண்டு பேசினார்; அவருடைய வசனம் என்னுடைய நாவில் இருந்தது (2 சாமு.23:2).

இந்த ஒவ்வொரு நிகழ்ச்சியிலும் எழுதும் செயலைத் தொடங்கிவைத்தவர் தேவனே. தேவன்தான் பேசினார். தேவன்தான் செய்தியைக் கொடுத்தார். தேவன் தான் எழுதவேண்டியதைக் கொடுத்தார். அவர்கள் எழுதினார்கள். தாவீது, எரேமியா போன்ற எல்லா வேதாகம புத்தக எழுத்தாளர்களும் தேவனுடைய வெளிப்படுத்தலை முதலில் பெற்றுக்கொள்ளுவார்கள். தேவன் வெளிப்படுத்திய செய்தியை அவர்கள் எழுதும்போது, வார்த்தைகள் தெய்வீகமாக அவர்கள் உள்ளத்தில் தூண்டப்பட்டன. அவர்கள் ஆவியானவரின் உதவியுடன் தங்களுக்குத் தரப்பட்ட செய்திகளை எழுதி வைத்தார்கள்.

இது எப்படி நடந்தது? பவுலும், பேதுருவும், யோவானும் தனித்தனியே வெவ்வேறு இடங்களில் இருந்தும் எழுதும்போது அவை எப்படி தேவசெய்தியாக மாறியது? அவர்கள் எழுதியது தேவன் அவர்கள் மூலம் எழுத விரும்பிய செய்திதானா என்று உறுதி செய்வது எப்படி? எது நடக்கவில்லை என்பதைப் புரிந்துகொண்டால் ஆவியானவரின் அகத்தூண்டுதல் எப்படி நடந்தது என்பதைத் தெரிந்து கொள்வோம்.

தேவன் தம்முடைய வார்த்தைகளை எவ்வாறு எழுதச்செய்தார் என்பது குறித்து ஐந்து தவறான கருத்துக்கள் கூறப்படுகின்றன. அவை ஒன்றின் மூலமும் ஆவியானவரின் அகத்தூண்டுதல் நடந்திருக்க முடியாது. அந்தப் புனைவுக் கருத்துக்களைக் காண்போம்.

1. அகத்தூண்டுதல் குறித்த இயற்கைக் கொள்கை

வில்லியம் ஷேக்ஸ்பியர் என்பவர் உலகப் புகழ்பெற்ற நாடகாசிரியர். அவர் நாடகங்களை எழுதும்போது, ஒருமுறை கூட தாம் எழுதிய ஒரு வரியை அடித்ததில்லையாம். அவர் ஒரு அகத்தூண்டுதல் பெற்றுத்தான் அந்த நாடகங்களை எழுதினார்.

அதுபோலவே வேதாகமப் புத்தக எழுத்தாளர்களும் இயற்கையான ஒரு அகத்தூண்டுதலைப் பெற்று எழுதியிருக்கலாம். நம் எல்லாரிடமும் ஒரு தெய்வீகப் பொறி உண்டு. இந்த எழுத்தாளர்களிடம் அது சற்று அதிகமாக இருந்திருக்கும்; எனவே அவர்கள் எழுதினர்.

இந்தக் கொள்கையின்படி இத்தகைய அகத்தூண்டுதல் அறிவுத்திறன்மிக்க மேதைகள், கவிஞர்கள். பாடகர்கள் போன்ற தனித்திறமையும் படைப்பாற்றலும் உள்ளவர்களிடம் இருக்கும் என்று கூறப்படுகிறது. ஆனால், மனிதனின் மன உந்துதலும் தூண்டுதலும் தேவனுடைய தூண்டுதல் அல்ல. மனிதனுடைய ஆவியின் தூண்டுதலால் ஒரு கிரியையை அவன் செய்வானானால் இயல்பாகவே அவனிடம் உள்ள தவறு செய்யும் தன்மை அவனுடைய எழுத்தில் பிரதிபலிக்கும்.

வேதத்திலுள்ள எந்தத் தீர்க்கதரிசனமும் சுயதோற்றமான பொருளையுடைய தாயிராதென்று நீங்கள் முந்தி அறிய வேண்டியது (2பேது.1:20). எனவே வேதாகமத்தில் உள்ள எந்தக் காரியமும் ஒரு மனிதனிடத்தில் இயற்கையாக உள்ள உந்துதலினால் எழுதப்பட முடியாது.

2. சொல்வதைக் கேட்டெழுதும் அகத் தூண்டுதல் கொள்கை

இந்தக் கொள்கையின்படி வேதாகமத்தில் உள்ள வார்த்தைகள் அனைத்தும் தேவனால் கூறப்பட்டவை. இதை எழுதினவர்கள் தேவன் கூறியதைக் கேட்டு அலுவலகங்களில் எழுத்தர்கள் எழுதுவதுபோல எழுதிவைத்தனர் என்பதாம்.

ஜமைக்காவில் உள்ள வேதாகமத்துக்குத் திரும்புக ஊழியத்தின் தலைவர் சாமுவேல் பிட்ஸ் ஹென்றி என்பவர் ஜமைக்கா முழுவதும் பல இடங்களில் “நிர்வாகப்யிற்சிக்கல்லூரி” நடத்தி வருகிறார். இந்தச் சாமுவேலின் தகப்பனார் ஒரு அற்புதமான இயந்திர அமைப்பை உருவாக்கினார். அதன் மூலம் புத்தகப் பகுதிகள் தெளிவாகவும், வேகமாகவும் வாசிக்கப்பட்டன. சாமுவேல் எட்டுவயதாய் இருக்கும்போதே இந்த இயந்திரத்தின் உதவியுடன் மிக வேகமாகச் செய்திகளைப் பதிவு செய்யப் பழகிவிட்டார். சாமு வேலுக்கு வயது 8 இருக்கும்போதே இதைச் செய்தார். இவர் தன்னைக் காட்டிலும் 3 அல்லது 4 மடங்கு அதிகமான வயதுள்ளவர்களைக் காட்டிலும் அதிகத் திறமையாகச் செய்துமுடித்துவிட்டார். சாமுவேல் பிட்ஸ் ஹென்றிக்கு இந்த முறையில் தேவன் கூறுவதை எழுதிவிட முடியும். ஆனால், தெக்கோவா ஊர் மேய்ப்பனான ஆமோஸ்-க்கும், கப்பர்நகூமில் உள்ள மீன்பிடிக்கும் தொழில் செய்துவந்த பேதுருவுக்கும் சுலபமாய் இருக்குமா? நிச்சயமாக அவர்களால் முடி யாது. அவர்கள் எழுதும்படி தேவன் சொல்லிக் கொடுத்துக்கொண்டிருத்திருக்க முடியாது.

வேதாகமம் தெய்வீக அன்பின் சரிதையைக் கூறும் ஒரு புத்தகம். நம்மை அதிகமாக நேசித்ததால் நமக்காக மரிக்கும்படி தமது குமாரனையே அனுப்பித்தந்த தேவன் வெறும் ஒரு இயந்திரம் அல்ல.

(தொடரும்)

மொழியாக்கம்: ஜி.வில்சன்

கிறிஸ்துவுக்குள் அன்புள்ள சத்தியவசனம் ஆசிரியர் அவர்களுக்கு ஸ்தோத்திரம். ஜீவனுள்ள தேவனின் ஜீவவார்த்தையை நான் அனுதினமும் தியானிக்க ஏதுவாக தங்கள் அனுப்பியுள்ள “அனுதினமும் கிறிஸ்துவுடன்” என்ற மாத இதழ் எனது ஆவிக்குரிய வாழ்விற்கு மிகவும் உறுதுணையாக இருக்கிறது. ஒவ்வொரு நாளும் அதை தியானித்து ஆவியானவரின் துணையுடன் ஜெபிக்கும் போது அதுவே எனக்குப் புதிய பெலனைத் தருகிறது.

Mr.L.Nelson, Madurai.

கிறிஸ்துவுக்குள் அன்பான சகோதரர் அவர்களுக்கு, தங்களுடைய அனுதினமும் கிறிஸ்துவுடன் மற்றும் சத்தியவசன சஞ்சிகை தவறாமல் வருவதற்காக நன்றி கூறுகிறேன். அதில் உள்ள தேவனுடைய வார்த்தையானது எனது தனிப்பட்ட வாழ்விலும் குடும்பவாழ்விலும் கர்த்தருக்குள் வளர்வதற்கு மிகமிக உதவி யாயும் ஆலோசனையாகவும் இருக்கிறது. எனக்காகவே என்னுடைய சூழ்நிலைக்கு ஏற்ப தேவனுடைய வார்த்தைகள் இருந்து என்னைப் பெலப்படுத்தி உற்சாகப்படுத்துகிறது.

Mr.Chandrasekar, Bangalore.

I watch and enjoy the daily Devotionals in whatsapp page. Very Useful and a blessing for our Spiritual growth Thank you.

Mrs.Hannah Victor, Madurai.

Praise the Lord, I use to read the passage in “Anuthinamum Christhuvudan” everyday before I read the biblical passage assigned for the day in some other books. The passage presented everyday in highly appropriate illustrative and easily absorbable in mind. The brief prayer given at the end is a good guide line to submit our request to the Lord. God bless your Ministry to Save the Soul’s of many from will deeds.

Mr.R.S.A.Sundersingh, Nellai.