Archive for December 16, 2017

வாக்குத்தத்தம்: 2017 டிசம்பர் 16 சனி

நான் உயிரோடிருக்கு மட்டும் என் கர்த்தரைப் பாடுவேன். (சங்.104:33)
வேதவாசிப்பு: ஆமோஸ். 4-6 | வெளிப்படுத்தல்.7

ஜெபக்குறிப்பு: 2017 டிசம்பர் 16 சனி

கர்த்தாவே, யார் உமக்குப் பயப்படாமலும், உமது நாமத்தை மகிமைப்படுத்தாமலும் இருக்கலாம்? (வெளி.15:4) எல்லாக் கனத்திற்கும் துதிக்கும் பாத்திரராகிய தேவன்தாமே சத்தியவசன பாடல் மற்றும் செய்தி சிடி ஊழியங்களை ஆசீர்வதித்திடவும் எல்லா இடங்களிலும் கர்த்தருடைய நாமம் உயர்த்தப்படவும் வேண்டுதல் செய்வோம்.

நம்பினான்! பெற்றுக்கொண்டான்!

தியானம்: 2017 டிசம்பர் 16 சனி; வேத வாசிப்பு: யோவான் 4:46-54

“உன் குமாரன் பிழைத்திருக்கிறான் என்று இயேசு தன்னுடனே சொன்ன மணிநேரம் அதுவே என்று தகப்பன் அறிந்து, அவனும் அவன் வீட்டாரனைவரும் விசுவாசித்தார்கள்” (யோவான் 4:53).

கிறிஸ்தவ வாழ்வின் அடித்தளமே விசுவாசமும் நம்பிக்கையும்தான். கிறிஸ்து நமக்காகப் பிறந்தார், வாழ்ந்தார், பாடுபட்டார், சிலுவையில் அறையுண்டு மரித்து அடக்கம் பண்ணப்பட்டு, மூன்றாம் நாள் உயிர்த்தெழுந்தார். இதுதான் கிறிஸ்தவ விசுவாசம். இதைச் சந்தேகித்து கேள்விகள் எழுப்புவோர் உண்டு. தேவனுடைய வார்த்தைகள் சத்தியம். அதை விசுவாசிப்பவர்களுக்கு அது வாழ்வு தரும்; அதைக் குறித்துத் தர்க்கிப்போருக்கு அது வீணாயிருக்கும்.

தன் குமாரன் மரண அவஸ்தையில் இருக்கிறான் என்றும், சீக்கிரமாய் வந்து அவனைக் குணமாக்கும்படியும் கேட்டுக்கொண்ட தகப்பனுக்கு இயேசு சொன்ன பதில்: “நீ போகலாம் உன் குமாரன் பிழைத்திருக்கிறான்” என்பதே. அவன் இயேசுவிடம் வரும்போது தன் மகன் மரண அவஸ்தையில் இருந்ததைக் கண்டுதான் வந்தான். அத்தோடு இயேசுவை தன்னோடுகூட சீக்கிரமாய் அழைத்துச் செல்லவே வந்தான். ஆனால், இயேசு எழுந்து அவசரமாகப் போகவில்லை. மாறாக, அவர் சொன்ன பதில் மிகவும் குழப்பமாக இருந்தது. ஆனாலும், அவன் நம்பிக்கையோடு புறப்பட்டுப்போனான்; அற்புதத்தைக் கண்டான். தேவனுடைய வார்த்தையை விசுவாசிப்போருக்கு அற்புதம் செய்ய, அவர்களை வழிநடத்த, அவர்களோடு கூடவே இருக்க ஆண்டவர் சித்தமுள்ளவராயிருக்கிறார்.

காணாததை விசுவாசிப்பதே மெய்யான விசுவாசம். தோமாவைப் பார்த்தும் ஆண்டவர் இதைத்தான் சொன்னார். “தோமாவே, நீ என்னைக் கண்டதினாலே விசுவாசித்தாய். காணாதிருந்தும் விசுவாசிக்கிறவர்களே பாக்கியவான்கள்”. நமது விசுவாசம் எப்படிப்பட்டது? வியாதிகளும், மரண அவஸ்தைகளும் வரும்போது நமது விசுவாசம் தடுமாறிப்போகிறதா? அல்லது எந்த சந்தர்ப்பத்திலும் அசையாமல் திடமாக நிலையாக இருக்கிறதா? நமது நம்பிக்கையை நாம் எதில் வைத்துள்ளோம்? தேவனுடைய வார்த்தையிலா அல்லது சந்தர்ப்ப சூழ்நிலைகளிலா? சந்தர்ப்ப சூழ்நிலைகள் மாறிப்போகும். ஆனால் தேவனின் வார்த்தைகளோ என்றென்றைக்கும் மாறாது; என்றும் நிலைத்துநிற்கும். நாம் நமது நம்பிக்கையை தேவனுடைய வார்த்தையில் வைத்து உறுதியாய் நடப்போம். அப்போது எதுவும் நம்மை அசைக்கமுடி யாது.

“அல்லாமலும், நம்முடைய நம்பிக்கையை அறிக்கையிடுகிறதில் அசைவில்லாமல் உறுதியாயிருக்கக்கடவோம். வாக்குத்தத்தம்பண்ணினவர் உண்மையுள்ளவராயிருக்கிறாரே” (எபிரெயர் 10:23).

ஜெபம்: தேவனே, சந்தர்ப்ப சூழ்நிலைகளை அல்ல, என்றென்றும் மாறாத உமது வார்த்தையின் மேலாக எங்கள் நம்பிக்கையை வைக்கிறோம். ஆமென்.

சத்தியவசனம்