Daily Archives: April 18, 2018

ஜெபக்குறிப்பு: 2018 ஏப்ரல் 18 புதன்

“நீ வருகையிலும் ஆசீர்வதிக்கப்பட்டிருப்பாய், நீ போகையிலும் ஆசீர்வதிக்கப்பட்டிருப்பாய்” (உபா28:6) என்ற வாக்குப்படியே சத்தியவசன ஊழியத்தின் பங்காளர்களாகவும் ஆதரவாளர்களாகவும் ஜெபத்தினால் தாங்கி வருகிற ஒவ்வொருவரையும் கர்த்தர் ஆசீர்வதித்து அவர்களை கனப்படுத்த வேண்டுதல் செய்வோம்.

சிக்கிக்கொண்ட யூதாஸ்

தியானம்: 2018 ஏப்ரல் 18 புதன்; வேத வாசிப்பு: யோவான் 13:1-11

“அந்தத் துணிக்கையை அவன் வாங்கினபின்பு, சாத்தான் அவனுக்குள் புகுந்தான். அப்பொழுது இயேசு அவனை நோக்கி: நீ செய்கிறதைச் சீக்கிரமாய் செய் என்றார்” (யோவான் 13:27).

வனாந்தரமான இடத்தில் பிரயாணப்பட்ட ஒருவன் தனது ஒட்டகத்தை வெளியில் விட்டு கூடாரத்துக்குள் படுத்துக்கொண்டான். குளிர் அதிகமாகவே ஒட்டகமானது தனது மூக்கைக் கூடாரத்துக்குள் விட்டது. இதைக் கண்ட மனிதன் பரவாயில்லை என்று இருந்துவிட்டான். சிறிது நேரத்தில் ஒட்டகம் தனது தலையை விட்டது. அதையும் அவன் கவனத்திற் கொள்ளவில்லை. சற்று நேரத்தில் ஒட்டகம் தனது முதுகையும் கூடாரத்துக்குள் நுழைக்க, கூடாரம் உடைந்து இருவருமே குளிரில் நடுங்கினர்.

இதைப்போலவேதான் யூதாசும் பிசாசுக்கு தன் உள்ளத்தில் கொஞ்சம் கொஞ்சமாக இடங்கொடுத்திருந்தான். முடிவில் பிசாசானவன் முழுவதுமாகவே அவனுக்குள் புகுந்துவிட்டான் என்று வாசிக்கிறோம். இப்போது யூதாஸ் பிசாசின் பிடியில் முழுமையாகவே சிக்கிக்கொண்டான். அவன் வெளியுலகில் பரிசேயர் வேதபாரகரின் சூழ்ச்சிக்கும், உள்ளத்திலோ பிசாசின் தந்திரத்துக்குள்ளும் அகப்பட்டு, பண ஆசையில் சிக்கி ஒரு முப்பது வெள்ளிக்காசுக்காக இவ்விதமாக எல்லாவிதத்திலும் வெளிவரமுடியாதபடி சாத்தானிடம் சிக்கிக்கொண்டான். அவனை விடுதலையாக்க ஆண்டவரால் மட்டுமே முடியும் நிலையில் இருந்தது. ஆண்டவரோ துணிக்கையைக் கொடுத்து, ‘நீ செய்வதைச் சீக்கிரமாய் செய்’ என்றபோது, ஆண்டவரின் பாதத்தில் விழுந்திருந்தால் மன்னிப்பை அவன் பெற்றிருப்பான். அவனோ பிசாசுக்கு அடிமைப்பட்டவனாய் அங்கிருந்து சீக்கிரமாய்ப் புறப்பட்டுவிட்டான்; முடிவில் அழிந்துபோனான்.

நம்மைச் சிக்கவைத்து விழ வைக்கவே பிசாசானவன் கங்கணம் கட்டிக் கொண்டு அலைகிறான். அவனது தந்திரங்களை நாம் இனங்கண்டு அதைவிட்டு விலகாவிடில் நாமும் யூதாசைப்போலவே சிக்கிக்கொள்ளுவோம். பிசாசுக்கு நாம் ஒரு சிறிய இடத்தைக் கொடுத்தால் போதும், நம்மை முழுமையாக தன் வலைக்குள் அவன் சிக்கவைத்து விடுவான். அவனது தந்திரங்களை முளையிலேயே கிள்ளி எறிய நாம் ஆயத்தமாய் இருக்கவேண்டும். பாவத்தில் சிறிய பாவம், பெரிய பாவம் என்று எதுவும் கிடையாது. தேவனுடைய வார்த்தைக்குப் புறம்பான அனைத்துமே பாவம்தான். ஒரு சிறு பொறி மனதில் விழுந்துவிட்டதை உணரும்போதே உஷாராகி, தேவனிடத்தில் நம்மை ஒப்புக்கொடுத்து விடுவோமாக. பொறி பற்றியெரிய ஆரம்பித்தால், நாம் எரிந்துபோய் விடுவோம்.

“நீங்கள் பிசாசின் தந்திரங்களோடு எதிர்த்துநிற்கத் திராணியுள்ளவர்களாகும்படி, தேவனுடைய சர்வாயுதவர்க்கத்தையும் தரித்துக்கொள்ளுங்கள்” (எபேசியர் 6:11).

ஜெபம்: பரிசுத்தமுள்ள தேவனே, நான் பிசாசின் தந்திரத்துக்குள் சிக்கிக்கொண்ட தருணங்களுக்காக மனவருந்துகிறேன். அதற்கான காரணங்களை தேவசமுகத்தில் கண்டறிந்து அதை சரி செய்வதற்கு உதவியருளும். ஆமென்.

சத்தியவசனம்