இன்றைய தியானம்

தியானம்: 2026 அக்டோபர் 14 புதன் | வேத வாசிப்பு: லூக்கா 8:1-3

பின்பு, அவர் பட்டணங்கள்தோறும் கிராமங்கள்தோறும் பிரயாணம் பண்ணி, தேவனுடைய ராஜ்யத்திற்குரிய நற்செய்தியைக் கூறி பிரசங்கித்துவந்தார் (லூக்கா 8:1).

இன்று பலரது ஊழியங்கள் பட்டணங்களுக்குள் மட்டுமே மட்டுப்படுத்தப்பட்டதாக நடைபெறுகின்றது. பட்டணங்களில் தொழில்புரிபவர், கிராமங்களுக்குச் சென்று ஊழியம் புரிவது கடினம். அதற்கு முழுநேர ஊழியரின் பங்கு அவசியமாகிறது. இயேசு கிறிஸ்து சீஷர்களோடு சேர்ந்து பட்டணங்களிலும், கிராமங்களிலும் நற்செய்தியை அறிவித்தார். ஆனால், அநேகரின் ஊழியங்கள் இன்று பட்டணங்களில் மட்டுமேயுள்ளது. கிறிஸ்து இயேசுவை அறியாத கிராமங்கள் ஏராளம் உண்டு. அவற்றிற்கு யார் நற்செய்தியைக் கொண்டு சென்று அறிவிப்பார்கள்?

சாமுவேல் மென்டிஸ் என்பவர் திருச்சபைக்குப் போயிராத கிராம மக்களுக்குள் சென்று சுவிசேஷத்தை அறிவித்தார். இலங்கையில் கிராமங்களுக்குச் சென்று யாரும் சுவிசேஷத்தை அறிவிக்காத காலத்தில், இலங்கையின் கிராமங்களுக்குள் மிஷனரியாகச் சென்று சுவிசேஷத்தை அறிவித்தார். அவரது ஊழியத்தின் பலன்களை இன்றும் பல சபைகளும், ஸ்தாபனங்களும் அனுபவித்து வருகின்றன. அவர் ஊழியம் செய்த ஒரு கிராமத்தில் அவர் நடத்திய ஓய்வுநாள் பாடசாலையில் இருந்த ஒரு பெண்ணைச் சந்தித்தேன். அவள் இப்போது ஒரு முழுநேர ஊழியக்காரி. இதேவிதமாக எத்தனையோ கிராமத்தவர்கள் அந்த மனிதருடைய ஊழியத்திற்கூடாகக் கிறிஸ்துவை அறிந்து ஏற்றுக்கொண்டார்கள். கிராமப்புறங்கள்தோறும் சுவிசேஷத்தை அறிவிக்க அவர் பட்ட கஷ்டங்கள் ஏராளம். பிரயாண வசதிகள் அற்ற அந்தக் காலத்திலும் பல மைல்கள் நடந்துசென்று ஊழியஞ்செய்தார்.

ஆனால் இன்று ஊழியர்களில் பலர் பட்டணங்களையே குறிவைத்துள்ளனர். பட்டணங்களிலும் ஊழியம் செய்யவேண்டும். அதேசமயம் கிராமங்களையும் மறந்து விடக்கூடாது. இயேசுவோடிருந்த சில பெண்கள் தங்கள் ஆஸ்திகளால் தேவனுக்கு ஊழியம் செய்தார்கள் என்று லூக்கா எழுதியுள்ளார் (லூக்.8:3). ஆம், இயேசுவின் காலத்தில் பெண்கள் பணத்தால் இயேசுவின் ஊழியத்தைத் தாங்கினார்கள். அத்தோடு நின்றுவிடாமல், இயேசுவோடு சென்று ஊழியத்திலும் ஈடுபட்டனர். இன்று கிராம ஊழியங்கள் சிறிதளவில் நடந்தாலும், இன்னும் அது பெருகவேண்டும். இதனை வாசிக்கும் சகோதரனே, சகோதரியே, நமது கண்கள் கிராமங்களை நோக்கி திறக்கப்படாதா? கிறிஸ்துவை அறிந்திராத கிராமங்களுக்குப் போய் சுவிசேஷத்தை அறிவிக்க முன்வர மாட்டோமா? ஆகக் குறைந்தது, கிராமங்களுக்கு மிஷனரிகளை அனுப்புவதற்காக நம்மால் கூடுமானளவு உதவிசெய்ய மாட்டோமா? நான் என்ன செய்யவேண்டும், எங்கே செல்லவேண்டும், என்ன பேசவேண்டும்; கற்றுத்தந்து என்னை நடத்தும் என்று ஜெபித்து நம்மை ஒப்புக்கொடுப்போமா?

ஜெபம்: தகப்பனே, கிராமங்கள்தோறும் நடைபெற்றுவரும் சுவிசேஷஊழியத்தில் நாங்களும் இணைந்து செயலாற்றவும், சுவிசேஷத்திற்கு அடைபட்டுள்ள கதவுகள் திறக்கப்படவும் ஜெபிக்கிறோம். ஆமென்.

தியானம்: 2026 அக்டோபர் 13 செவ்வாய் | வேத வாசிப்பு: வெளி. 3:1-6

இந்தத் தொழுவத்திலுள்ளவைகளல்லாமல் வேறே ஆடுகளும் எனக்கு உண்டு, அவைகளையும் நான் கொண்டு வரவேண்டும் (யோவான் 10:16).

திருச்சபையிலே மிஷன் ஊழியமாவது, இயேசுவினால் ஆரம்பிக்கப்பட்டு சபையினூடாக நடத்தப்படுகின்ற ஒன்றாகும். புதிய ஏற்பாட்டுச் சபை ஒரு மிஷனரி சபை. ஆனால், இன்றுள்ள அநேக சபைகள் இயேசு கிறிஸ்துவின் பிரதான கட்டளைக்குக் கீழ்ப்படியாமைக்கான காரணம் என்ன? இன்றைய சபைகளில் பரவிவரும் ஒரு உபதேசமும் அதற்கொரு காரணமாகும். அதென்னவெனில், “எல்லா மதங்களும் மனிதனை இரட்சிப்புக்குள் வழிநடத்தும் வழிகளே; எல்லா மதங்களிலும் பரிசுத்த ஆவியானவர் கிரியை செய்கின்றார்” என்ற போலி உபதேசமே அது. அவராலேயன்றி வேறொருவராலும் இரட்சிப்பு இல்லை; நாம் இரட்சிக்கப்படும்படிக்கு வானத்தின்; கீழெங்கும் மனுஷர்களுக்குள்ளே அவருடைய நாமமேயல்லாமல் வேறொரு நாமம் கட்டளையிடப்படவும் இல்லை என்று வேதம் தெளிவாகப் போதிக்கின்றது (அப்.4:12). ஆனால், இன்று தேவ வார்த்தையை விசுவாசித்து, அதற்குக் கீழ்ப்படிவதற்குப் பதிலாக, பகுத்தறிவையும், விஞ்ஞானத்தையும் கொண்டு வேதவசனத்தைத் திரிபுபடுத்திக் கேள்வி கேட்பவர்கள் பலர். திருச்சபை, தேவனது மிஷன் ஊழியத்தை நிறைவேற்ற பெரும் தடையாக இருப்பது நல்லதல்ல.

மிஷனைக் குறித்ததான சரியான போதனைகள் சபையில் இல்லாதது இன்னுமொரு காரணமாகும். கிறிஸ்து இல்லாதவர்கள் தொலைந்துபோனவர்கள்; கிறிஸ்துவை விசுவாசியாத பட்சத்தில் கொடிய நரக தண்டனைக்குள் ளாவார்கள் என்ற சத்தியத்தைக்குறித்த உணர்வு சபைகளில் குறைவாக இருக்கிறது. சபை விசுவாசிகள், பிரதான கட்டளை தங்களுக்குரியதல்ல, வேறு யாருக்கோ உரியதென்று எண்ணுகிற மனப்பான்மையும் ஒரு காரணமாகும். விசுவாசிகளின் கூட்டமே சபை. எனவே, ஒவ்வொரு விசுவாசியும் மிஷன் ஊழியத்தில் பங்குகொள்ளவேண்டும். மிஷனரி தரிசனமற்ற ஊழியரும், ஊழியத்திற்குப் போதகரை மாத்திரம் சார்ந்திருக்கும் விசுவாசிகளும் இன்னும் சில காரணங்களாகும்.

எல்லாவற்றிற்கும் மேலாக, கிறிஸ்தவர்களின் சுயநலமான போக்கே, மிஷனரி ஊழியத்தில் சபை ஈடுபடாமைக்கு முக்கிய காரணமாகும். ஆத்தும ஆதாயம், சபை ஸ்தாபித்தல், சீஷத்துவம் என்பதற்குச் செவிகொடுத்தால், தன் பணத்தையும் நேரத்தையும் சொகுசான வாழ்வையும் இழக்கவேண்டி வருமே என்று பலர் எண்ணுகிறார்கள். ஓடாமல் ஓரிடத்தில் தங்கியிருக்கும் தூய தண்ணீர் இலகுவில் மாசுபட்டு, கிருமிகளைத் தோற்றுவிக்கும். விருத்தியடையாத ஊழியமும் அவ்வாறே இருக்கும். இன்று நாம் பங்களிப்புச் செய்யும் நமது சபை எந்த நிலையில் இருக்கிறது? அது விருத்தியடையவில்லை என்று நீங்கள் உணர்ந்தால், அதற்காக நீங்கள் என்ன பங்களிப்பு கொடுக்கிறீர்கள்? மிஷனரிப் பணியைக்குறித்த பொறுப்பை நமதுசபையிலே உணர்த்த நம்மால் முன்வர முடியுமா?

ஜெபம்: பரமபிதாவே, சபை மிஷன் பணியில் பின்தங்கி இருப்பதற்கு எங்களது சுயநலங்கள் காரணமாகிவிடாதபடி காத்தருளும். ஆமென்.

தியானம்: 2026 அக்டோபர் 12 திங்கள் | வேத வாசிப்பு: ரோமர் 10:13-15

.. பிரசங்கிக்கிறவன் இல்லாவிட்டால் எப்படிக் கேள்விப்படுவார்கள்? அனுப்பப்படாவிட்டால் எப்படிப் பிரசங்கிப்பார்கள் (ரோமர் 10:14,15).

வில்லியம் கேரி அவர்கள், மிஷனரி தாகமுள்ளவராக, மிஷனரி ஊழியத்தின் அவசியத்தை வலியுறுத்தி, அதற்கு ஒப்புக்கொடுக்கும்படி சவாலான உரைகளை நிகழ்த்தினார். இதற்காக ஒரு மிஷனரி சங்கமும் ஏற்படுத்தப்பட்டது. ஆனால் எவரும் முன்வரவில்லை. அப்பொழுது நடந்தது என்னவென்பதை ஜெ.பி. மிடில் புரூக் என்பவர் இவ்வாறு வர்ணிக்கின்றார்:

“இதுகாறும் யாரேனும் ஒருவர் சுவிசேஷகனாக அயல்நாடு செல்லவேண்டும் என்ற எண்ணம் கொண்டிருந்த வில்லியம் கேரியின் இருதயத்தில் திடிரென ஒரு ஒளி மிளிர்ந்தது. ஒரு எண்ணம் மலர்ந்தது. மற்றவர்கள் போகவேண்டுமென்று கூறி வருகிறேனே; நான் ஏன் போகக்கூடாது? மிஷனரி ஊழியத்திற்கு நானே செல்லாவிட்டால் வேறு யார் செல்வார்? நான் செல்லமுடியாத இடத்திற்கு பிறர் போகவேண்டுமென்று இனி நான் வாதிடுவது தவறு. ‘சுவிசேஷத்தைப் பிரசங்கியாவிட்டால் உங்களுக்கு ஐயோ’ என்று பிறரைப் பார்த்து அறைகூவல் விடுக்கிறேனே; சுவிசேஷத்தைப் பிரசங்கியாவிட்டால் எனக்கு ஐயோ இல்லையா? நீங்கள் உலகெங்கும் போய், சர்வ சிருஷ்டிக்கும் சுவிசேஷத்தைப் பிரசங்கியுங்கள் என்று இயேசு கூறியபோது என்னையும் சேர்த்துத்தானே கூறியுள்ளார். ஆகவே, உடனே ஓடிச்சென்று கிறிஸ்துவின் பாதத்தில் வீழ்ந்து, ‘ஆண்டவரே இதோ அடியேன் இருக்கின்றேன். என்னை அனுப்பும்’ என்று வேண்டிக்கொள்வேன் என்று தீர்மானித்தார்.”

அதன்படி வில்லியம் கேரி அவர்கள் இந்தியாவுக்கு மிஷனரியாக வந்து, பலவித இன்னல்கள் மத்தியிலும் சோர்ந்துபோகாமல், அரும்பாடுபட்டு இந்தியருக்குக் கிறிஸ்துவை அறிவித்தார். வேதவசனம் இந்திய மொழிகளில் இந்திய மக்களை அடையவேண்டுமென்று பெரும்பாடுபட்டு, சுமார் 40 மொழிகளில் புதிய ஏற்பாட்டை மொழிபெயர்த்தார். வில்லியம் கேரி அவர்கள் தேவனுடைய அழைப்பை ஏற்று இந்தியாவுக்கு மிஷனரியாகச் சென்றதால் அநேக இந்தியர்கள் கிறிஸ்துவை அறிய ஏதுவாயிற்று.

இன்றும் சுவிசேஷம் அறிவிக்கப்படாத, ஒருமுறையேனும் இயேசு என்ற நாமத்தைக் கேள்விப்பட்டிராத அநேக நாடுகளும், அநேக பட்டணங்களும், கிராமங்களும், மக்களும் உண்டு. இவர்களுக்கு இயேசு கிறிஸ்துவைச் சொல்ல ஆட்களை அனுப்பும் என்று ஜெபிப்பதில் தவறில்லை. ஆனால், ‘நற்செய்தியை அறிவிக்க என்னை அனுப்பும் ஆண்டவரே’ என்று ஏன் நாம் நம்மை ஒப்புவிக்கக்கூடாது? மிஷனரி ஊழியத்தைச் செய்ய தேவன் நம்மையும் அழைக்கின்றார் என்பதை இன்று நாம் உணர்ந்தால், என்னால் எழுந்து புறப்பட முடியுமா?

ஜெபம்: ஆண்டவரே, அறுப்புக்கு வேலையாட்களை அனுப்பும் என ஜெபிக்கிறவர்களாய் மட்டுமல்ல; வில்லியம்கேரியைப் போன்று சவால்களை ஏற்றுக்கொள்கிறவர்களாக நாங்கள் புறப்பட்டுச் செல்ல எங்களுக்குதவும். ஆமென்.

தியானம்: 2026 அக்டோபர் 11 ஞாயிறு | வேத வாசிப்பு: ரோமர் 15:9-22

கிறிஸ்துவினுடைய நாமம் சொல்லப்பட்டிராத இடங்களில் சுவிசேஷத்தை அறிவிக்கும்படி நாடுகிறேன் (ரோமர் 15:21).

இன்று அநேக சபைகள் கிறிஸ்தவர்கள் மத்தியில் மட்டுமே ஊழியம் செய்து கொண்டிருக்கின்றனர். சுவிசேஷத்தைப் பலமுறை கேட்டு அலுத்துப் போனவர்களுக்கே திரும்ப திரும்ப சுவிசேஷத்தை சொல்லிக்கொண்டிருக்கிறார்கள். ஏற்கனவே ஒரு சபையில் உள்ளவனிடம் அச்சபையைப்பற்றி குறையாகச் சொல்லி, தமது சபைக்கு அழைத்து, அவனுக்குத் திரும்பவும் ஞானஸ்நானமும் கொடுக்கின்றார்கள். மக்களும் சபைக்குச் சபை தாவிக் கொண்டிருக்கின்றார்கள். சுவிசேஷமோ இன்னும் அநேக இடங்களில் அறிவிக்கப்படாமல் இருக்கின்றது.

பவுலடியார் எந்தவொரு இடத்திலும் நிரந்தரமாகத் தங்கியிருந்தார் என்று நாம் வாசிக்க முடியாது. சுவிசேஷம் சொல்லப்படாத இடங்களைத் தேடித்தேடிச் சென்றார். இதனால் பல இன்னல்களை அவர் சந்திக்க நேரிட்டது. ஆனால், அவரது மிஷனரிப் பணிகளால் சுவிசேஷத்தை அறிந்து ஏற்றுக் கொண்டவர்கள் ஏராளம்.

புதிய இடங்களுக்குச் சுவிசேஷத்தை அறிவிக்கப்போவது இலகுவான காரியமல்ல. ஏற்கனவே செய்துகொண்டிருக்கும் ஊழியம் ஒருவித பாதுகாப்பையும் சௌகரியத்தையும் ஐக்கியத்தையும் கொடுப்பதால் நாம் அதனைவிட்டுப் போக விருப்பமற்று இருக்கின்றோம். ஆனால், இவை நம்மை சோர்வுறப்பண்ண இடங்கொடுக்கலாகாது. நாம் புதிய இடங்களுக்குத் தனியே போய் ஊழியம் செய்வது அவ்வளவு நல்லதல்ல. இயேசுவும் சீஷர்களை இரண்டு இரண்டு பேராகவே அனுப்பினார். தனியே போனால் சோர்வடைந்துவிடவும், விழுந்துவிடவும் அதிக சந்தர்ப்பங்கள் உண்டு.

சில சபைகள் ஆரம்பிக்கப்பட்டு பத்து இருபது வருடங்களாகியும், அவர்கள் புதிய இடங்களில் சபைகளை ஆரம்பிக்காமல் இருப்பது வேதனைக்குரியது. சில சபைகள் பல புதிய இடங்களுக்குப்போய் சபைகளை ஸ்தாபித்துக் கொண்டிருக்க, மற்ற அநேக சபைகள் உறங்கிக்கொண்டிருக்கின்றன. சபை என்பது ஒரு கட்டிடம் அல்ல; அது அழைக்கப்பட்ட மக்களின் கூட்டத்தைக் குறிக்கின்றது. எனவே, சபை என்று கூறும்போது, அது அந்தச் சபையின் விசுவாசிகளையே குறிக்கும். எனவே, புதிய இடங்களுக்காக ஜெபிக்க ஆரம்பிப்போமா! புதிய இடங்களில் ஊழியங்களை ஆரம்பிக்க தேவ வழிநடத்துதலை நாடுவோமா? தேவ நற்செய்தி அறிவிக்கப்பட்டிராத இடங்களைக் கண்டுபிடித்து தேடிச்சென்று, அந்த மக்களுக்குச் சுவிசேஷத்தை எடுத்துரைக்க நாம் ஆயத்தமா? முதலில் சுவிசேஷபாரம் நமக்குள் உண்டா? அதன்பின்னர், ஆண்டவரை அறியாதவர் மத்தியில் அவருடைய அன்பை எடுத்துரைக்க நம்மை அர்ப்பணிப்போமா?

ஜெபம்: அன்பின் தேவனே, சுவிசேஷத்தைக் கேட்டிராத ஏராளமான இனமக்கள் மத்தியில் அருட்பணியாற்ற சுவிசேஷபாரத்தை எங்களுக்குத் தந்தருளும். ஆமென்.

தியானம்: 2026 அக்டோபர் 10 சனி | வேத வாசிப்பு: அப்போஸ்தலர் 26:13-22

இப்பொழுது உன்னை அவர்களிடத்திற்கு அனுப்புகிறேன் (அப்போஸ்தலர் 26:18).

மேரி ஸ்லெசர் என்ற 16 வயதுடைய பெண் ஸ்காட்லாந்து நாட்டில் ஒரு வேலை ஸ்தலத்தில் ஒரு நாளைக்கு 10 மணி நேரங்கள் வேலை செய்து கொண்டு, ஓய்வு நேரங்களிலும், ஞாயிறு நாட்களிலும், தேவனுக்காக உண்மையுடன் ஊழியஞ்செய்து வந்தாள். ஆப்பிரிக்காவைக் குறித்த வாஞ்சை அவளுக்குள் ஏற்பட்டது. ஆப்பிரிக்காவிற்கு மிஷனரியாகச் சென்ற டேவிட் லிவிங்ஸ்டன் இறந்துவிட்டார் என்பதால், அவரது இடத்திற்கு யார் போவார் என்ற கேள்வி உருவானபோது, இவள் தன்னை ஒப்புக் கொடுத்தாள். 16 வயதில் இவள் மிஷனரியானாள்.

அந்நாட்களில் ஆப்பிரிக்காவில் அடிமை வியாபாரமும், கோத்திரங்களுக்கிடையிலான சண்டையும் களியாட்டும் கொடுமைகளும் நிறைந்திருந்தது. சிலர் நரமாமிசப் பட்சிகளாக இருந்தனர். தலைவன் ஒருவன் மரித்தால், அவனது மனைவி மக்களையும் கொலை செய்துவிடுவார்கள். அடுத்த உலகில் அவனுக்குத் துணையாக அவளே இருக்கவேண்டுமென்று இப்படிச் செய்வார்கள். இரட்டைக் குழந்தைகள் பிறந்துவிட்டால் அது பிசாசினால் உருவானது என்று சொல்லி, இரு குழந்தைகளையும் கொன்று தாயையும் காட்டுக்குள் விரட்டிவிடுவார்கள். இப்படிப்பட்ட இடத்திற்கு யார் போவார்?

இந்தக் கொடுமை நிறைந்த பிரதேசத்திலேயே 16 வயதான இளம் பெண்ணான மேரி ஸ்லெசர் ஊழியஞ்செய்தாள். ஆப்பிரிக்க பிள்ளைகளுடன் விளையாடி நட்புறவை ஏற்படுத்தினாள். அச்சுறுத்தல்கள், எதிர்ப்புக்கள் மத்தியிலும் ஓய்வுநாள் பாடசாலையை நடத்தினாள். எதிர்ப்பு காட்டியவர்களும் அவள் நடத்திய கூட்டங்களுக்குப் போகத் தொடங்கினார்கள். கொல்லப்படும் குழந்தைகளைக் காப்பாற்றி வளர்க்க ஆரம்பித்தாள். ஆப்பிரிக்கர்கள் அவளை “அம்மா” என்று அன்பாக அழைத்தனர். ஆப்பிரிக்காவில் அவள் இருக்கையில் தனது பெற்றோர் மரித்துவிட்டனர் என்ற செய்தியைக் கேள்விப்பட்டாள். சுகவீனம் காரணமாகத் தன் நாட்டிற்குச் சென்றவள், திரும்பவும் வந்து, தான் மரிக்கும்வரை ஆப்பிரிக்காவில் ஊழியஞ் செய்தாள்.

அன்று சவுல் என்ற வாலிபனும் தேவனின் அழைப்பைக் கேட்டான். மிக உயர்ந்த பதவியில் இருந்த அவன் எல்லாவற்றையும்விட்டு, பவுலாக, தன்னை அழைத்தவருக்கு தன்னைத் தந்தான். 16 வயது இளம் பெண்ணை மிஷனரியாக அழைத்தவர், தனது உலக பெருமைகளுக்குள் திளைத்திருந்த பவுலை அழைத்தவர், இன்றும் வாலிப சகோதர சகோதரிகளையும் மிஷனரி ஊழியத்துக்கு ஒப்புக்கொடுக்கும்படிக்கு அழைக்கிறார். நமக்கு அந்த அழைப்புண்டா? அந்த அழைப்பின் சத்தம் நமக்குள் தொனிக்குமானால் அதற்குக் கீழ்ப்படிய நாம் தயாராய் இருக்கிறோமா?

ஜெபம்: அன்பின் பிதாவே, இளம்பிராயத்திலே அநேக வாலிபர்கள் மிஷனரிகளாக எழும்ப தேவரீர் கிருபை செய்யவேண்டுமென்று தாழ்மையோடு ஜெபிக்கிறோம். ஆமென்.

தியானம்: 2026 அக்டோபர் 9 வெள்ளி | வேத வாசிப்பு: யோவான் 4:35-36

அறுப்பு மிகுதி, வேலையாட்களோ கொஞ்சம்; ஆகையால் அறுப்புக்கு, எஜமான் … வேலையாட்களை அனுப்பும்படி அவரை வேண்டிக்கொள்ளுங்கள் (லூக்கா10:2).

கலாநிதி வூட்ரோ குரோல் என்பவர் 1991ல் வெளியிட்ட தனது புத்தகத்தில், 5.5 பில்லியன் உலக ஜனத்தொகையில், சுமார் 4 பில்லியன் மக்கள் இயேசு கிறிஸ்துவை சொந்த இரட்சகராக அறியாதவர்கள் என்றும், சுமார் ஒரு நாளைக்கு 50 ஆயிரம்பேர் மரிக்கின்றார்கள் என்றும், அதில் அரைவாசிப்பேர் கிறிஸ்துவையே கேள்விப்படாமல் மரிக்கிறார்கள் என்றும் குறிப்பிட்டுள்ளார். இது 1991ம் ஆண்டின் அறிக்கை; அப்படியானால் இன்று இந்த எண்ணிக்கை என்னவாயிருக்கும் என்பதை சிந்திப்போம். ஆம், உலகின் பல பாகங்களில் மக்கள் கிறிஸ்துவை அறியாமலேயே அன்றாடம் மரித்துக்கொண்டிருக்கின்றார்கள்.

இஸ்லாமிய நாடுகளை நோக்குவோமாயின், சவூதி அரேபியாவில் 93.4 வீதமும், ஏமனில் 99.9 வீதமும், துருக்கியில் 99.8 வீதமும் ஆப்கானிஸ்தானில் 99 வீதமும், பாகிஸ்தானில் 96.7 வீதமும் இஸ்லாமிய சகோதரர்களாக இருக்கின்றனர். இந்த நாடுகளில் ஏனைய மக்களில், வெளிநாடுகளிலிருந்து வேலை வாய்ப்புக்குச் சென்றவர்களும் உள்ளடக்கப்படுவர். எனவே, இந்த நாடுகளில் உள்ள கிறிஸ்தவர்களின் எண்ணிக்கை மிகவும் குறைவு. அண்மையிலுள்ள மாலத்தீவில் 99.4 வீதமான மக்கள் இஸ்லாமிய சகோதரர்கள். ஏனையோரில் வெளிநாட்டவர்களும் உள்ளடக்கப்படுகின்றார்கள். அங்கு சுவிசேஷ அறிவிப்புக்குத் தடை விதிக்கப்பட்டுள்ளது. (இது 1993ம் ஆண்டின் புள்ளி விபரம்)

இயேசு தாம் வாழ்ந்த நாட்களிலேயே, பன்னிரு சீஷர்களை மாத்திரமல்லாமல், வேறே எழுபதுபேரை நியமித்து, தமக்கு முன்னே இரண்டு இரண்டுபேராக அனுப்பினார். எவரும் தேவராஜ்யத்திற்கு நீங்கலாகிவிடக் கூடாது என்பதில் இயேசு காட்டிய அவசரம் இன்று நம்மிடம் உண்டா?

வெளி நாடுகளில் சிறிய அளவில் ஊழியஞ்செய்யும் ஊழியர்களுக்காக நாம் ஜெபிக்கக் கடமைப்பட்டுள்ளோம். தேவன் இத் தேசங்களில் பெரிதான வாசல்களை திறக்கவேண்டுமென்றும், அநேக ஊழியர்கள் இந்த தேசங்களில் எழும்பவேண்டுமென்றும், மிஷனரிகள் பலர் இத்தேசங்களுக்கு அனுப்பப்பட வேண்டுமென்றும் ஜெபிப்போம். அவர்களின் பாதுகாப்புக்காகவும் இரட்சிப்பின் செய்தியை மக்களோடு பகிர்ந்துகொள்ள தடைகள் நீக்கப்படவும் ஜெபிப்போம். இந் நாடுகளில் சாத்தானின் கோட்டை தகர்த்தெறியப்படவும், தேவன் வல்லமையாக கிரியை செய்து, அநேகரை இரட்சிக்கவேண்டுமென்றும் ஜெபிப்போம். கிறிஸ்து இல்லாமல் மரித்துக்கொண்டிருக்கும் இந்த மக்களுக்காக ஜெபிக்க நம்மில் யார் இன்று நம்மை ஒப்புக்கொடுக்கப் போகிறோம்?

ஜெபம்: நல்ல ஆண்டவரே, மிஷனரிபணிக்கு தடைவிதிக்கப்பட்டுள்ள இடங்களுக்காகவும், கடினமான இடங்களில் ஊழியம்செய்யும் ஊழியர்களது பாதுகாப்புக்காகவும், தைரியமாய் சுவிசேஷத்தைப் பிரசங்கிக்கவும் நாங்கள் ஜெபிக்கிறோம். ஆமென்.