இன்றைய ஜெபக்குறிப்பு

நீங்கள் என் நாமத்தினாலே எதைக் கேட்பீர்களோ, குமாரனில் பிதா மகிமைப்படும்படியாக, அதைச் செய்வேன் (யோவான் 14:13) என்ற வாக்குப்படி இந்தநாளின் சத்தியவசன அலுவலக ஜெபக்கூடுகையில் ஏறெடுக்கப்படும் ஜெபவிண்ணப்பங்களுக்கு ஏற்ற மறுஉத்தரவுகளை கர்த்தர் அருளிச்செய்து, கூட்டம் ஆசீர்வாதமாய் நடை பெறுவதற்கு எல்லா இயற்கை அனுகூலங்களையும் தந்தருள ஜெபிப்போம்.

நமது தேசத்தில் போதைப் பொருட்கள் முற்றிலுமாக ஒழிக்கப்படுவதற்கும், அதை கள்ளசந்தையில் விற்பவர்கள், அதை கடத்தும் தொழிலில் ஈடுபடுபவர்கள் இரட்சிக்கப்படுவதற்கும் போதைப்பொருளுக்கு அடிமைப்பட்டுள்ள ஒவ்வொருவரது ஆத்ம விடுதலைக்காக, அந்த குடும்பங்களின் சமாதானத்திற்காக ஜெபிப்போம்.

கர்த்தருடைய வசனம் கேட்கக் கிடையாத பஞ்சத்தை அனுப்புவேன் (ஆமோஸ் 8:11) இந்த நாட்களுக்கு முன் வேதவசனங்களை கட்டுரைகளை தியானங்களை வாஞ்சையோடு வாசித்து வசனத்தால் கர்த்தருடைய ஜனத்தின் இருதயம் நிரப்பப்படவும், அவர்களுக்கு தயாரித்து அனுப்பப்படும் சத்திய வசன இலக்கிய வெளியீடுகள் அவர்களுக்கு பிரயோஜனமாயிருப்பதற்கும் ஜெபிப்போம்.

அவருடைய நாமம் பரிசுத்தமும் பயங்கரமுமானது (சங்.111:9) அவருடைய நாமம் தரிக்கப்பட்ட கர்த்தருடைய ஜனங்கள் பயபக்தியோடே ஆராதனை செய்யவும், வறியவர்களும் திக்கற்றவர்களும் சபையில் விசாரிக்கப்பட, மிகவும் சிறியவராகிய இவர்களில் ஒருவனுக்கு நீங்கள் எதைச் செய்தீர்களோ அதை எனக்கேச் செய்தீர்கள் என்ற ஆண்டவருடைய வாக்கு நிறைவேற்றப்படவும் ஜெபிப்போம்.

பங்காளர்குடும்பங்களில் இரட்சிக்கப்படாதவர்கள் தங்கள் வாழ்க்கையை ஆண்டவருக்கு ஒப்புக்கொடுத்து சாட்சிகளாய் வாழவும், பின்மாற்றத்தில் இருப்பவர்கள் தங்களை ஆராய்ந்து மனந்திரும்பி ஆதிஅன்பிற்குள் வரவும், ஆவிக்குரிய வாழ்வில் வளர்ந்து கர்த்தருக்குப் பிரியமாய் ஜீவிக்க வேண்டுதல் செய்வோம்.

மத்திய கிழக்கு ஆசியாவில் அமைந்துள்ள ஜோர்டானுக்காக ஜெபிப்போம். அண்டை நாடுகளிலிருந்து தஞ்சமடைந்துள்ள இலட்சக்கணக்கான அகதிகளுக்காகவும், புதிய விசுவாசிகள் விசுவாசத்தில் நிலைத்திருப்பதற்கும், பொருளாதார நெருக்கடிகள் நீங்கி, மக்கள் இயல்பான வாழ்வு வாழ, சமாதானம் நிலவ, அதிகாரிகள் மற்றும் நாட்டின் அதிபர்களுக்காக ஜெபிப்போம்.