அனுதினமும் கிறிஸ்துவுடன்…

கர்த்தருக்குக் காத்திரு; … திடமனதாயிருந்து கர்த்தருக்கே காத்திரு. (சங்.27:14)
வேதவாசிப்பு: காலை: எரேமியா 51,52 | மாலை: தீத்து 2

“சிருஷ்டிக்கப்படும் ஜனம் கர்த்தரைத் துதிக்கும்” (சங்.102:18) என்ற வாக்குப்படி கர்த்தருடைய ஆச்சரியமான வழிநடத்துதலுக்காக அவரைத் துதிக்கும் துதி எப்போதும் நமது வாயிலிருக்கட்டும். கர்த்தருடைய நாமம் நம்மூலம் மகிமைப்படவும். கர்த்தரை உறுதியாய் பற்றிக்கொண்டு முன்னேறிச் சென்று ஜெயம்பெற ஜெபிப்போம்.

தியானம்: 2026 நவம்பர் 1 ஞாயிறு | வேத வாசிப்பு: சங்கீதம் 41:1-13

என் சத்துரு என்மேல் ஜெயங்கொள்ளாததினால், நீர் என்மேல் பிரியமாயிருக்கிறீரென்று அறிவேன் (சங்.41:11).

நாம் திடகாத்திரமாய் ஆரோக்கியமாய் வசதியாக இருக்கையில் தேவனைத் தேடுவதைப் பார்க்கிலும், வருத்தத்தில், தேவைகளில், மனகிலேசத்தில் இருக்கும்போது, தேவனைத் தேடுவது அதிகமாய் இருக்கும் என்பதை எவருமே மறுக்கமுடியாது. நமக்கு போக்கிடம் இல்லை என்றபோது, தேவ பாதத்திலேயே விழுந்துகிடப்போம். அப்படியொரு நிலையில்தான் இந்த சங்கீதத்தை எழுதிய தாவீது புலம்புகிறான்.

பழைய ஏற்பாட்டுக்காலத்தில் தேவனுடைய ஜனங்கள் பாவம் செய்தபோதெல்லாம், தேவவார்த்தைக்குக் கீழ்ப்படிய மறுத்தபோதெல்லாம், அந்நியர்கள் கைகளில் ஒப்புக்கொடுக்கப்பட்டார்கள். அவர்கள் மனந்திரும்பி தேவனை நோக்கிக் கூப்பிடும்போதெல்லாம் தேவன் அவர்களை மீட்டுக்கொள்வதை திரும்ப, திரும்ப வாசிக்கலாம். அப்படி மனந்திரும்பாவிட்டால், அவர்கள் ஒரு வாதையினால், நோயினால் வாதிக்கப்படுவர். பின்பு தேவனை நோக்கிக் கூப்பிட்டு அதிலிருந்து விடுதலை பெறுவர். அன்று தேவனுடைய தண்டனை உடனுக்குடன் வந்தது.

இங்கே தாவீதும் தனது பகைவர் தனக்கு எதிராகச் செயற்படுவதையும், தனக்கு எதிராக அவர்கள் குதிங்காலைத் தூக்குவதையும் குறிப்பிடுகிறார். படுக்கையிலிருக்கும் இவன் இனிப் பிழைக்கமாட்டான்; தீராத வியாதியாலே பீடீக்கப்பட்டுள்ளான்; இனி எழுந்திருக்கமாட்டான் என்று தனக்கு விரோதமாக சத்துருக்கள் பேசியதைக் குறிப்பிடுகிறார். அதன் பின்னர் நம்பிக்கையாய் அவர் சொல்லுகிறார்: “என் சத்துரு என்மேல் ஜெயங்கொள்ளாததினாலே நீர் என் மேல் பிரியமாய் இருக்கிறீர் என்று அறிவேன்” என்பதாகும். அக்காலத்தில், ஒருவன் தேவனுக்குப் பிரியமாய் இல்லாமற்போனால் அவன் சத்துருவாகிய மனுஷர் கைகளில் ஒப்புக்கொடுக்கப்படுவான் என அவர்கள் நம்பினார்கள். ஆனால் புதிய ஏற்பாட்டுக்காலத்திலோ நமக்கு மனுஷரோடு போராட்டம் இல்லை என்பதும், அந்தகாரலோகாதிபதியாகிய பிசாசானவனோடும், நமது உள்ளான மனுஷனாகிய பாவசுபாவத்தோடுமே நமக்குப் போராட்டம் உண்டு என்பதுவும் தெளிவு. அதனால்தான் இயேசு ஊழியத்தை ஆரம்பிக்கும் முன்னரே சாத்தானை வெற்றிகொண்டார்; உலகத்தையும் வெற்றிகொண்டார்.

இயேசுவோ, எந்த மனிதனோடும் சண்டைபோடவில்லை. அதுபோலவே நாமும் தேவனுக்குப் பிரியமான பிள்ளைகளாய் வாழ்ந்து அவருடைய தண்டனைக்குத் தப்பித்துக்கொள்ள வேண்டுமாயின், நமது உள்ளான மனிதனைப் பரிசுத்தமாய்க் காத்துக்கொள்ளவேண்டும். பிசாசின் தந்திரங்களுக்கு எதிர்த்து நிற்கவேண்டும். இப்படியாக கிறிஸ்துவின் வல்லமையோடு முற்றிலும் ஜெயங்கொண்ட வாழ்வை வாழ்வோமாக. பாவத்தை எதிர்த்து பரிசுத்தமாய் வாழுவோமாக.

ஜெபம்: அன்பின் ஆண்டவரே, உமது வல்லமையினால் முற்றிலும் ஜெயங்கொண்ட வாழ்வை வாழ எங்களுக்கு அனுக்கிரகம் செய்யும். ஆமென்.

கிறிஸ்துவுக்குள் பிரியமுள்ள வாசகர்களுக்கு,

“பாலகனாய்” இவ்வுலகில் அவதரித்த நமதாண்டவர் இயேசுகிறிஸ்துவின் நாமத்தில் அன்பின் வாழ்த்துக்களைத் தெரிவிக்கிறோம்.

வருஷத்தை நன்மையால் முடிசூட்டுகிற தேவன் இவ்வருடத்தில் நம்மை நன்மையாய் நடத்தினார். இதோ, உலகத்தின் முடிவுபரியந்தமும் சகல நாட்களிலும் நான் உங்களுடனேகூட இருக்கிறேன் (மத்.28:20) என்று வாக்குப்பண்ணினவர் வாக்கு மாறாதவராய் நாம் கடந்துவந்த வாழ்வின் எல்லா ஏற்றத்தாழ்வுகளிலும், குறைவிலும் நிறைவிலும் நம்மோடுகூடவே இருந்து நம்மை பாதுகாத்தார். இவ்வருடம் முழுவதும் பங்காளர்களும் ஆதரவாளர்களும் ஜெபத்தோடு சத்தியவசன ஊழியத்தைத் தாங்கிவந்தீர்கள். அனைவருக்கும் நன்றிகளைத் தெரிவித்துக்கொள்கிறோம்.

தங்களுடைய மேலான ஆதரவினால் சத்தியவசன தொலைக்காட்சி, வாட்ஸ்அப், இணையதளம், YouTube ஊடகங்கள் மூலமாகவும் மாதாந்திர பத்திரிக்கை, இலக்கியபணி வாயிலாகவும் நற்செய்தி தடைகளின்றி அறிவிக்கப்பட கர்த்தர் கிருபை செய்தார். கர்த்தருக்கே எல்லா மகிமையும் உண்டாவதாக!

இத்தியானபுத்தகத்தில் வெளியாகிவரும் வேதவாசிப்பு அட்டவணைப்படி பரிசுத்த வேதாகமத்தை தவறாது வாசித்துமுடிக்கிறவர்கள் வழக்கம் போல் பெயர்களை ஜனவரி 31ஆம் தேதிக்குள் எங்களுக்கு எழுதித் தெரிவியுங்கள். அவர்கள் பெயர்களை அனுதினமும் கிறிஸ்துவுடன் இதழில் பிரசுரிப்போம்.

இவ்விதழில் நவம்பர் மாத தியானங்களில் சகோதரி தர்ஷினி சேவியர் அவர்கள் எழுதியுள்ள தியானங்களும், டிசம்பர் மாத தியானங்களில் சகோதரி சாந்தி பொன்னு அவர்கள் இந்த பண்டிகை காலங்களில் கிறிஸ்து பிறப்பின் செய்தியை நாம் எவ்வளவாய் அறியாதமக்கள் மத்தியில் கொண்டுசெல்கிறோம் என்பதை தியானித்து வழங்கியுள்ளார்கள். இத்தியானங்களை வாசித்து சிந்தித்து நம் வாழ்வில் அப்பியாசப்படுத்த ஆவியானவர் உதவிசெய்வார். சத்தியவசன பங்காளர்கள் ஆதரவாளர்கள் அனைவருக்கும் அன்பான கிறிஸ்துமஸ் வாழ்த்துக்களைத் தெரிவிக்கிறோம்.

ஆ.ஜான் துரை

அதிகாலை வேளையில்… (நவம்பர் – டிசம்பர் 2026)
Dr.W.வாரன் வியர்ஸ்பி

வேதபகுதி: சங்கீதம் 48; வெளி. 21: 1-6

காலங்கள் செல்லச்செல்ல, பேரரசுகளும், தேசங்களும், நகரங்களும், அவற்றின் புகழ்பெற்ற தலைவர்களும் தோன்றி மறைகின்றனர்; ஆனால் எருசலேம் நகரம் என்றென்றும் நிலைத்திருக்கும்! வேறு எந்த நகரத்துக்கும் இத்தகைய சிறப்பை நாம் கொடுக்கமுடியாது. ஆதியாகமம் 14:18 ல் தொடங்கி வெளிப்படுத்தல் 21:10 முடிய எண்ணூறுக்கும் மேற்பட்ட முறை குறிப்பிடப்பட்டுள்ளது. (‘சாலேம்’ எனில் சமாதானம் என்று பொருள்; எபிரெயர் 7:1-10). எருசலேம் எத்தகைய நகரம்?

தெரிந்தெடுக்கப்பட்ட ஒரு நகரம்: தேவன் தமது கிருபையும் வல்லமையுள்ள சித்தத்திலும் செய்த எண்ணற்ற தெரிவுகளில் இரட்சிப்பின் வரலாறும் அடங்கியுள்ளது. முதலாவதாக அவரது படைத்த எல்லா வான மண்டலங்களிலும் தமது திட்டம் நிறைவேற்றப்படும் ஓர் இடமாக பூமியைத் தெரிந்தெடுத்தார் (சங்.24:1). தேவனுடைய வார்த்தையையும் அவருடைய குமாரனையும் உலகிற்குள் கொண்டுவர யூதர்களைத் தெரிந்தெடுத்தார் (உபாகமம் 7:6). ஏனெனில் இரட்சிப்பு யூதர்களிடமிருந்து வருகிறது (யோவான் 4:22). தமது மக்களான இஸ்ரவேலரின் தாயகமாக அவர் கானானைத் தேர்ந்தெடுத்தார் (உபா.1:8). மேலும் சீயோன் மலையை அத்தேசத்தின் தலைநகரின் இருப்பிடமாகத் தெரிவு செய்தார். கர்த்தர் வாசம் பண்ணும் பரிசுத்த ஸ்தலத்தின் இருப்பிடமாகவும் எருசலேம் இருக்கும் (சங். 132:13-18). காத்தர் தெரிந்துகொண்ட நகரம் எருசலேமே (சகரியா 3:2). இயேசு கிறிஸ்துவை உலகிற்குக் கொண்டுவரும் வம்சத்தை நிறுவ தாவீதை தேர்ந்தெடுத்தார் (1 இராஜா.11:34). என்னே ஒரு சிறப்பான நகரம்!

குற்றமுள்ள ஒரு நகரம்: எருசலேம் ‘ஒரு பரிசுத்த நகரம்’ (நெகேமியா 11:1,18; ஏசாயா 48:2, மத். 4:5; 27:53); அது ‘கர்த்தருடைய நகரம்’ (சங்கீதம் 46:4; 48:1; ஏசாயா 60:14). பண்டைய யூத மக்கள் அந்நகரத்தைக் குறித்து பெருமையுடன் அதனை ‘அழகின் பரிபூரணம், சர்வ பூமியின் மகிழ்ச்சி’ (புலம்பல் 2:15) என்று கொண்டாடினர். ஆனால் தேவனுடைய குமாரன் இயேசு பூமிக்கு வந்தபொழுது அந்நகரம் தீட்டுப்பட்டு அடிமைத்தனத்தில் இருப்பதைக் கண்டு, குற்றமுள்ள அந்த நகரத்துக்காக அழுதார் (மத்தேயு 23:25-69; லூக்கா 13: 34,35).

பரலோக நகரம்: (எபிரெயர் 12:18,24). கிறிஸ்தவர்களின் மலை இப்பூமியில் இல்லை; இயேசுவும் இப்புனித பூமியில் இல்லை; நம்முடைய பிதாவும் இரட்சகரும் பரலோகத்தில் இருக்கிறார்கள். நம்முடைய வீடும் வீதியும் அங்குதான் உள்ளன. நம்முடைய பொக்கிஷங்களும் அங்கேதான் இருக்கவேண்டும் (மத்தேயு 6:19-21), கிறிஸ்தவர்கள் மேலேயுள்ள இஸ்ரவேலுக்கு உரியவர்கள் என்று கலா. 4:31-32 விளக்குகிறது. ஏனெனில் தேவனுடைய பிள்ளைகள் அனைவரும் பரலோகத்தின் குடிமக்கள் (பிலிப்பியர் 3:20). முற்காலத்து கோத்திரப்பிதாக்கள் போல நாம் இப்பூமியில் நாடோடிகளும், மோட்சப் பயணிகளாகவும் இருக்கிறோம். நம்முடைய நிரந்தர குடியிருப்பான பரலோகத்தை நாடிச்செல்லுகிறோம் (எபி.11:13-16). எனவே நாம் கிறிஸ்து இருக்கும் மேலான காரியங்களையே தேடவேண்டும். நமது மனதை பூமியில் உள்ள காரியங்கள் மீது அல்ல, மேலான காரியங்கள் மீது நாட்டம் வைக்கவேண்டும் (கொலோசேயர் 3:1-2). இறுதியில் அனைத்தும் தேவனிடமிருந்தே வரவேண்டும். சங்கீதம் 87 ஐ எழுதிய கோராகின் புத்திரர் பூமிக்குரிய சீயோனைப் பற்றி எழுதினார். ஆனால் அதை நாம் பரலோக சீயோனுக்குப் பொருத்தி “எங்கள் ஊற்றுகளெல்லாம் உன்னில் இருக்கிறது” (வச. 7) என்று சொல்லலாம். இயேசு தம்மிடம் வந்து பானம் பருக நம்மை அழைக்கிறார் (யோவான் 7:37- 39).

ஒரு நித்திய நகரம்: புதிய வானமும் புதிய பூமியும் ஒரு நாள் உண்டாகும். புதிய எருசலேம் நகரம் தேவனிடமிருந்து பூமிக்கு இறங்கி வரும் (வெளி 21:1-6). இது “தேவன் (எருசலேமை) என்றென்றைக்கும் நிலைநிறுத்துவார்”; என்ற தீர்க்கதரிசனத்தின் நிறைவேற்றமாக இருக்கும். வெளிப்படுத்தல் புத்தகத்தின் கடைசி இரண்டு வசனங்கள் அந்த நகரத்தின் மகத்துவத்தையும் மகிமையையும் விவரிக்கின்றன. மகிமைப்படுத்தப்பட்ட தேவனுடைய பிள்ளைகள் புதிய பூமியில் உள்ள பரலோக நகரத்தில் வீடுகளையும், அதற்குள் செல்லும் வழியையும் கொண்டிருப்பார்கள். யூதர்களும் மற்ற இனத்தவரும் அந்த நகரத்தில் ஒன்றுபடுவார்கள். ஏனெனில் அதன் வாசல்களுக்கு இஸ்ரவேல் கோத்திரங்களின் பெயர்களும், பன்னிரண்டு வாயில்களுக்கு அப்போஸ்தலர்களின் பெயர்களும் சூட்டப்பட்டுள்ளன (வெளி. 21:9-15). “நான் உங்களுக்காக ஒரு இடத்திற்குப் போகிறேன்,” என்று இயேசு அறிவித்திருக்கிறார் (யோவான் 14:1-3).

ஒரு தொலைக்காட்சித் தொகுப்பாளர், “மத்திய கிழக்கின் சமாதானத்துக்கு எருசலேமே திறவுகோல்” என்று கூறியது என் நினைவுக்கு வருகிறது. “எருசலேமின் சமாதானத்திற்காக ஜெபியுங்கள”; (சங்கீதம் 122:6) என்ற வசனமும் என் நினைவுக்கு வந்தது. நீங்கள் எருசலேமுக்காக ஜெபிக்கிறீர்களா?

சகோதரர்களே, அவர்கள் இரட்சிக்கப்படவேண்டும் என்பதே என் இருதயத்தின்
விருப்பமும் நான் தேவனிடம் நான் செய்யும் ஜெபமுமாகும் (ரோமர் 10:1).

(மொழியாக்கம்: Sis.அகஸ்டா மங்களதுரை)

வேதாகமம் உருவானது எப்படி? (நவம்பர் – டிசம்பர் 2026)
Dr.உட்ரோ குரோல்

அதிகாரம் – 4

1378இல் ஜான் விக்ளிஃப் பரிசுத்த வேதாகமத்தின் உண்மைத்தன்மை என்னும் தலைப்பில் ஒரு செய்தியை அச்சிட்டு வெளியிட்டார். இதில் வேதாகமத்தில் எந்தப் பிழையும் இல்லை; வேதாகமம் முழுவதிலும் தேவனுடைய வெளிப்பாடு இருக்கிறது என்று வலியுறுத்தினார்.

விக்ளிஃப் தைரியமாக அந்நிய ஆக்கிரமிப்புகள் மத்தியில் ஆங்கிலேயர்களின் உரிமைகள் பற்றியும், இங்கிலாந்து திருச்சபையில் நுழைந்து கொண்டிருக்கும் தீமைகள், தவறுகள், கெட்ட பழக்கவழக்கங்கள் இவற்றையும் சுட்டிக்காட்டி அறிக்கைகள் வெளியிட்டுக் கொண்டிருந்தார்.

1379இல் விக்ளிஃப் போப்பின் அதிகாரத்தை எதிர்த்தார். சபையின் தலைவர் இயேசுகிறிஸ்துவே. போப் அல்ல என்று அச்சிட்டு வெளியிட்டார். விசுவாசிக்கு முழுஅதிகாரமும் அளிப்பது சபை அல்ல, வேதாகமமே என்று உறுதியாகக் கூறினார். சபையானது புதிய ஏற்பாட்டுத் திருச்சபையின் மாதிரியில் இயங்கவேண்டும் என்று முழக்கமிட்டார்.

விக்ளிஃப், இவரது ஆதரவாளர்கள் இவர்களின் முயற்சியால் சபைமக்கள் அனைவரும் படித்து உண்மைகளைத் தெரிந்துகொள்ளும்படியாக, வேதாகமத்தை மக்களுக்கு அவரவர் மொழியில் கிடைக்க வகைசெய்தனர். 1382 இல் புதிய ஏற்பாடு ஆங்கிலத்தில் மொழி பெயர்க்கப்பட்டு முடிந்தது.

இங்கிலாந்தில் கல்வியறிவில்லாதவர்கள், சாதாரண குடிமக்கள், போர்வீரர்கள், ஏழைகள், தாழ்த்தப்பட்ட மக்கள் இவர்களுக்குப் படிக்கும்படி வேத புத்தகங்களைக் கொடுப்பது ஒரு மனக் கடினமான வேலையாக இருந்தது. வேதாகமத்தைப் படித்ததும், உள்ளங்கள் புத்துணர்ச்சியடைந்தன; ஆத்துமாக்கள் இரட்சிக்கப்பட்டனர்; தேவன் மகிமைப்பட்டார்.

ஒரு விக்ளிஃபின் எதிரி இவ்வாறு கூறினான்: விக்ளிஃப் நற்செய்தியை மிகவும் சாதாரணமாக ஆக்கிவிட்டார். சாதாரண ஆண்களும் பெண்களும் எளிதில் பெற்றுக்கொள்ளக்கூடியதாக ஆக்கிவிட்டார். கற்றறிந்த பெரியவர் களுக்கும், போதகர்களுக்கும் கொடுக்கவில்லை. இது பன்றியின் முன் முத்துக்களைப் போடுவதற்குச் சமம். நற்செய்தி என்னும் முத்துக்களை ஏழைகள் என்ற பன்றிகள் முன் போடுகிறார். பிரயோஜனம் என்ன? என்றான். அவனுடைய இத்தகைய கருத்துக்கு நாம் ஆண்டவருக்கு நன்றி கூறவேண்டியதுதான்!

இறைப்பணியில் ஆண்டவருடைய பங்கு என்ன? என்பதைக் கண்டு பிடிப்போம். தெய்வீக ஆயுதமான வேதாகமம் இப்பொழுது ஆயத்தமாயிருக்கிறது. எல்லா மக்களின் கரங்களிலும் இருக்கிறது. 16ஆம் நூற்றாண்டில் சீர்திருத்தப் புரட்சி இதனால் நடந்தேறியது. கர்த்தருடைய வசனம் என்றென்றும் வாழ்ந்து, தங்கியிருப்பது, கற்றவர்கள் அறிஞர்களின் கைகளிலிருந்து விடுவிக்கப்பட்டு, ஷெல்புகளில் வைத்து பூட்டி, இருட்டறைகளில் தூசுபிடிக்கப் போடப்பட்டிருந்தது. இப்பொழுது வெளியேற்றப்பட்டு, மொழிபெயர்க்கப்பட்டு இங்கிலாந்தின் மக்களுக்கு அவர்களுடைய மொழியிலேயே படிக்கும்படி கொடுக்கப்பட்டுள்ளது.

விக்ளிஃப் சத்தியத்தின் பிறப்பிடம் வேதாகமம் மட்டுமே என்று அறிக்கை செய்தார். “போப் அல்லது அவருடைய ஆலோசனைக்குழு தவறு எதுவும் செய்வதில்லை” என்ற கொள்கையை வன்மையாகக் கண்டித்தார். எதிர்த்தார். மறுத்தார்.போப் பிறப்பிக்கும் கட்டளைகள் வேதாகமக் கொள்கைகளுக்கு ஒத்திருந்தால் மட்டுமே செல்லுபடியாகும் என்றார். சபைப் பொறுப்பில் இருக்கும் போதகர்கள், பாதிரியார்கள், பிஷப்புகள், போப் ஆகியோர் ஆளுகை செய்வதற் கல்ல. ஊழியம் செய்யவும், மக்களுக்கு உதவிசெய்யவும் மட்டுமே இருக்கின் றனர் என்றார்.

லோலார்டுகள் (Lollards) என்பவர்கள் மரித்தவர்களை அடக்கம் செய்யவும், பிணியாளிகளுக்கு உதவி செய்யவும் என்று தொண்டு புரிபவர்கள் போலாவார்கள் என அழைக்கப்பட்டனர். விக்ளிஃப் ஆக்ஸ்போர்டு பல்கலைக் கழகத்தில் படித்து வெளியேறும் பட்டதாரிகளை ஏழைப் பாதிரிகள் என்னும் தலைப்பில் பட்டியலிட்டுச் சேர்த்தார். இவர்கள் எங்கும் திரிந்து நற்செய்தி அறிவிக்கவும், பிணியாளிகளுக்கும்,ஏழைகளுக்கும் உதவி செய்யவும், விக்ளிஃப்பின் கொள்கைகளைப் பரப்பவும் அனுப்பப்பட்டனர். 1401இல் தேசத்துப் பாராளு மன்றம் லேலார்டு கருத்துக்களைப் பிரசங்கிப்பவர்களுக்கு ‘மரண தண்டனை’ என அறிவித்தது.

லண்டனில் உள்ள ஆர்ச் பிஷப், ‘விக்ளிஃப் பிரசங்கம் செய்யக்கூடாது’ என்று தடைவிதித்து விட்டார். எனவே விக்ளிஃப் தனது துறவி மடத்துக்குச் சென்று வேதாகமத்தை மொழி பெயர்ப் பதில் ஈடுபட்டார். அதோடு துண்டுத்தாள் பிரதிகளையும் எழுதி வெளியிட்டார்.

1384 டிசம்பர் மாதம் 28ஆம் நாள் லட்டர்வொர்த் சபையில் ஆராதனை நடத்திக்கொண்டிருக்கும்போது விக்ளிஃப் திடீரென்று பக்கவாதம் நோயால் பாதிக்கப்பட்டார். மூன்று நாட்களுக்குப் பிறகு இறந்துவிட்டார்.

விக்ளிஃப் எழுதிய புத்தகங்கள், துண்டுப் பிரதிகள் அனைத்தும் வெளியிடப்பட முடியாதபடி தடுத்து நிறுத்தப்பட்டன. 1415இல் கான்ஸ்டன்ஸ் மாநாட்டில் விக்ளிஃப் எழுதிய புத்தகங்கள் பிரசுரங்கள் அனைத்தையும் எரித்து அழித்துவிடுமாறு உத்தரவிடப்பட்டது. விக்ளிஃப்பின் சடலத்தையும் எரித்துச் சாம்பலாக்கிவிடுமாறு கட்டளையிடப்பட்டது.

1428இல் இந்தக் கட்டளைகள் நிறைவேற்றப்பட்டன. ஆனால் விக்ளிஃப்பின் சாதனைகளை யார் அழிக்கமுடியும்? அவை அவர் வைத்துப்போன சுதந்தரமாக நமக்கு உள்ளன.

1. விக்ளிஃப் பின்னால் இங்கிலாந்தில் சீர்திருத்தம் ஏற்பட வழிவகுத்து வைத்தார்.

2. அவர் ஆங்கிலேயர்களுக்கு ஆங்கில மொழியில் வேதாகமம் கிடைக்கச் செய்தார்.

3. இவருடைய எழுத்துக்களும் கருத்துகளும் லோலார்டுகளை ஆயத்தம் செய்தன. அவர்கள் இங்கிலாந்து முழுவதும் நற்செய்தியோடு விக்ளிஃப்பின் சீர்திருத்தக் கருத்துக்களையும் பரவச்செய்தனர். சபைச் சீர்திருத்தமும், சமயச் சீர்திருத்தமும் நடைபெறுவது வரை லோலார்டுகளின் பணி தொடர்ந்தது.

4. சபையில் உயர்ந்தவன், தாழ்ந்தவன் என்ற வேறுபாடு காட்டப்படக்கூடாது. அனைவரும் சமமாக நடத்தப் படவேண்டும் என்னும் இவருடைய கருத்து ஏழை விவசாயிகளுக்கு ஆதரவாயிருந்தன. பின்னால் 1381இல் ‘விவசாயிகள் புரட்சி’ ஏற்பட இது வழிவகுத்தது.

5. இங்கிலாந்தில் படித்துக்கொண்டிருந்த பொஹீமியாவைச் சேர்ந்த மாணவர்கள், விக்ளிஃப்பின் சீர்திருத்தக் கருத்துக்களை பொஹீமியாவுக்கு எடுத்துச் சென்று, அங்கு பரவச் செய்தனர். இந்தக் கருத்துக்கள் மக்கள் மனதில் வேரூன்றி, பின்னர் ஜான் ஹஸ் ஊழியம் செய்யும்போது, அவருடைய கருத்துக்களை மக்கள் ஏற்றுக்கொள்ள உதவியாய் இருந்தது.

(தொடரும்)

மொழியாக்கம்: ஜி.வில்சன்