ஜெபக்குறிப்பு: 2026 அக்டோபர் 31 சனி

கர்த்தர் தம்முடைய மகத்துவமான நாமத்தினிமித்தம் தமது ஜனத்தைக் கைவிடமாட்டார் (1சாமு.12:22) மகத்துவமான தேவன் பத்துமாதங்களை நாம் காணும்படி கிருபை செய்தார். கர்த்தர் செய்த நன்மைகளை, அதிசயமான செயல்களை எண்ணி எண்ணி முழுஇருதயத்தோடும் முழுபெலத்தோடும் நன்றி சொல்லி ஸ்தோத்திரித்து ஜெபிப்போம்.

கிறிஸ்தவ ஐசுவரியவான்

தியானம்: 2026 அக்டோபர் 31 சனி | வேத வாசிப்பு: 1தீமோத்தேயு 6:17-19

YouTube video

… ஐசுவரியமுள்ளவர்கள் … சகலவித நன்மைகளையும் நமக்குச் சம்பூரணமாய்க் கொடுக்கிற ஜீவனுள்ள தேவன் மேல் நம்பிக்கை வைக்கவும் (1தீமோத்.6:17).

முன்பெல்லாம் ஒரு மனிதன் தேசம், குலம், கல்வி இப்படிப்பட்டவைகளால்தான் சமூகத்தில் அவன் இனங்காணப்பட்டான். ஆனால் இன்று அது மாறிவிட்டது. ஒருவன் தனக்கென எவ்வளவு அதிகமாய் பொருட்களை வாங்கிக்கொள்ள வல்லமைப் படைத்தவனாய் இருக்கிறானோ, அதுவே அறிமுகப்படுத்தும் ஒரு முக்கிய காரணியாகிவிட்டது. அப்படிப்பட்டவனுக்கு வருவாயும் தாராளமாகக் கிடைக்கும். அவன் தனது பணத்தை பல இடங்களில் முதலீடும் செய்திருப்பான். அவனுடைய நம்பிக்கை, இந்த முதலீடுகளிலும், வருவாய் அதிகரிப்பிலுமே தங்கியிருக்கும்.

இப்படியான ஐசுவரியம் கிறிஸ்தவ ஐசுவரியம் அல்ல. அதற்காக கிறிஸ்தவர்கள் பணக்காரர்களாக இருக்கமுடியாது என்பதல்ல அர்த்தம். ஒரு கிறிஸ்தவ பணக்காரனுக்கு, அடிப்படையிலே அவனுடைய நம்பிக்கை தனது செல்வத்தில் அல்ல. அதைக் கொடுத்த தேவன்மீதே இருக்கும். அவன் தனக்கென எவ்வளவைச் சேர்த்துக்கொள்ளமுடியும் என்பதில் அல்ல; மாறாக எவ்வளவு தாராளமாய் கொடுக்கமுடியும், நன்மை செய்யமுடியும், எவ்வளவு நற்கிரியைகள் செய்யமுடியும் என்பவைகள் தான் அவனுடைய பலமாக இருக்கும். தனக்கென சேர்த்துக்கொள்கிறவனை உலகம் “ஐசுவரியவான்” என்கிறது. இதில் லட்சாதிபதி, கோடீசுவரர் என ஒவ்வொரு படிநிலைகள் உண்டு. அதேபோலவே, கிறிஸ்தவ வாழ்விலும், அவர்கள் எவ்வளவாய் நற்கிரியைகளில் ஐசுவரியவான்களாகக் காணப்பட முடியும் என்ற ஒவ்வொரு நிலைகள் உண்டு. “நித்திய ஜீவனைப் பற்றிக்கொள்ளும்படி வருங்காலத்திற்காக தங்களுக்கு நல்ல ஆதாரத்தைப் பொக்கிஷமாக வைக்கும்” அளவுக்கு, அவர்களுக்கு உயர்வுப் படிநிலைகள் உண்டு. இவ்வுலகில் ஐசுவரியவானாக, தேவன் தந்த நல்ல சந்தர்ப்பதை இழந்துபோகாமல், நற்கிரியைகளில் ஐசுவரியவானாக உயர்த்தப்பட்டு, நித்திய ஜீவனைப் பற்றிக்கொள்ளும்படியான மகா பெரிய முதலீட்டை வைக்க நாம் முயற்சிக்கவேண்டும்.

நற்செய்தி சென்றடையாத நாடுகளுக்கு நற்செய்தியைக் கொண்டு செல்வதற்காக, தமது ஐசுவரியங்களை முதலிட்டு, பல இழப்புகளைச் சந்தித்த பல செல்வந்தர்கள் இருந்தார்கள். உதாரணமாக சி.டி.ஸ்டட் என்பவர் பிறப்பாலே செல்வந்தர். சீனாவிற்கு மிஷனரியாகச் சென்ற அவர், அங்கிருந்தபடியே 1887 இல், தனது ஆஸ்தி முழுவதையும் விற்று மூடி, ஜார்ஜ் முல்லர், இரட்சண்ய சேனை போன்ற ஊழியங்களுக்கு அனுப்பிவைத்தார். இது செலவு அல்ல; முதலீடு. நீங்கள் உங்கள் ஐசுவரியங்களை யாருக்காக முதலீடு செய்திருக்கிறீர்கள் ?

ஜெபம்: ”கர்த்தாவே, நீர் எனக்களித்த இவ்வுலகத்து ஐசுவரியங்களை உமக்கென்றும் உமது ஊழியத்துக்கென்றும் முதலீடு செய்ய எனக்கு மனதைத் தாரும். ஆமென்.”

ஜெபக்குறிப்பு: 2026 அக்டோபர் 30 வெள்ளி

மேற்கு பசிபிக்பெருங்கடலின் தீவுநாடாகிய பிலிப்பைன்ஸ் உலகஅளவில் அதிக மிஷனரிகளை அனுப்பும் நாடாக ஆசீர்வதிக்கப்பட்டுள்ளது. சபைகளுக்குள் ஒருமைப்பாடு, சமாதானம் பெருகவும், சத்தியத்தில் உறுதியாய் நிற்கவும், வாலிபப்பிள்ளைகள் நல்வழியில் நடத்தப்பட, அடிக்கடி ஏற்படும் இயற்கை சீற்றங்களின் பாதிப்புகளிலிருந்து மக்கள் பாதுகாக்கப்பட ஜெபிப்போம்.

நல்ல போராட்டம்

தியானம்: 2026 அக்டோபர் 30 வெள்ளி | வேத வாசிப்பு: ரோமர்; 6:14-23

YouTube video

விசுவாசத்தின் நல்ல போராட்டத்தைப் போராடு, நித்திய ஜீவனைப் பற்றிக்கொள், அதற்காகவே நீ அழைக்கப்பட்டாய்” (1தீமோ.6:12)

அன்பு மற்றும் பொறுமையுடன் சேர்ந்த நல்ல போராட்டமே நல்ல போராட்டம் “விசுவாசப் போராட்டமாகும்”. சதுரங்க விளையாட்டில், அதன் நோக்கமே எதிரியின் ராஜாவைத் தப்பியோடவிடாது சிறைப்படுத்துவதுதான். இதற்குத் திட்டம்போட்டே சதுரங்கம் விளையாடும் வீரர்கள் காய்களை நகர்த்துவர். நமது காய்களில் சிலவற்றை எதிரி வெட்டிவிட்டான் என்பதற்காக, நமது இறுதி இலக்கை மறந்து, நாமும் அவனது காய்களை வீழ்த்தவேண்டும் என்று வீறாப்பு கொண்டால் விளையாட்டு தோல்வியில்தான் முடியும். நமது காய்கள் சில போனாலும், அதைப் பொருட்படுத்தாது, இறுதி இலக்கை நோக்கமாகக் கொண்டு திட்டமிட்டு விளையாடும் சதுரங்க விளையாட்டே இறுதியில் வெற்றிபெறும்.

ஒருவிதத்தில் கிறிஸ்தவ போராட்டமும் இப்படிப்பட்டதுதான். பொறுமை, சாந்தம் என்பவையே நமது போராட்டத்தின் போர்நியதிகள். தேவன் நமக்குத் தரும் பணியை அவரது நாமத்தின் மகிமைக்காகப் பொறுமையுடன் செய்திடுவதே நமது இலக்கு. இந்த இலக்கை மறந்து, வேறு நோக்கங்களை நாடுவோமானால், அது நம்மைத் தோல்வியில்தான் கொண்டுபோய்விடும். பொறுமை, அன்பு ஆகியவற்றை விட்டுவிட்டு, குறுக்கு வழியில் நமது இலக்கை அடைய முற்பட்டால் அந்தப் போராட்டம் எப்படிப்பட்டது தெரியுமா? சாத்தானால் சோதிக்கப்பட்டும், தனது பாடுநிறைந்த பாதையை விட்டுவிலகாதவராக, இலகுவான வழியைத் தேடாதவராக, சிலுவைவரை சென்று வெற்றிசிறந்த நமது ஆண்டவராகிய இயேசு சென்ற வழியை அது அவமதிப்பது போலாகிவிடும். ஆனால் குறுக்கு வழியில் செல்லும்போது அது சிலசமயம் வெற்றி பெறுவதுபோல நமக்குத் தெரியலாம். அது வெறும் தோற்றம் மட்டுமே. ஆனால் தோல்விதான் நிஜம்.

சிலுவைப்பாடு, மரணம், உயிர்த்தெழுதல் மூலமாக ஆண்டவர் நமக்கு நித்திய ஜீவனுக்கு வழி திறந்துள்ளார். அந்த வழியிலே நித்திய ஜீவன் ஒன்றையே இலக்காக வைத்து பொறுமையுடனும் விசுவாசத்துடனும் ஓடவே நாம் அழைக்கப்பட்டிருக்கிறோம். அந்த இலக்கை நாம் இழந்துவிட்டால், நாம் ஓடுவதில் என்ன பலன்? எனவே பாரமான யாவற்றையும் தள்ளிவிட்டு, அவரவருக்கு நியமித்த ஓட்டத்திலே பொறுமையோடே, அந்த இலக்கை மாத்திரமே நோக்கி ஓடக்கடவோம். இதுதான் ஒரு கிறிஸ்தவன் அடையக்கூடிய, அடையவேண்டிய வெற்றி. நாம் இன்று எந்த வழியில் ஓடிக்கொண்டிருக்கிறோம்? எந்த நோக்கத்தோடு ஓடிக்கொண்டிருக்கிறோம்? வெற்றியடைவதல்ல முக்கியம். சரியான வழியில் சென்று வெற்றியடையவேண்டும். அதுதான் முக்கியம்.

ஜெபம்: “சிலுவை நாதரே, நித்திய ஜீவனுக்கான இலக்கை, உலகம் காட்டுகின்ற வழியில் சென்றடையாமல், உமது வழியில் மாத்திரம் நடந்து வெற்றியடைய உமது கிருபை தாரும். ஆமென்.”