2020 ஆம் ஆண்டில் அடியெடுத்து வைத்திருக்கும் சத்தியவசன நேயர்கள், பங்காளர்கள், நிகழ்ச்சி ஆதரவாளர்கள் மற்றும் வாசகர்கள் யாவருக்கும் இந்த புதிய ஆண்டு ஓர் ஆசீர்வாதமான ஆண்டாய் அமைய வாழ்த்துகிறோம். இந்நாட்காட்டியிலுள்ள வேதவசனங்கள் உங்கள் ஆவிக்குரிய வாழ்விற்கு பிரயோஜனமாய் அமைய தேவன் கிருபை செய்வாராக!
(சங்.32:8)
நான் உனக்குப் போதித்து, நீ நடக்க வேண்டிய வழியை உனக்குக் காட்டுவேன்.
ஆதியாகமம் 1,2 | மத்தேயு 1
தியானம்: 2020 ஜனவரி 1 புதன் | வேத வாசிப்பு: ஏசாயா 6:1-8
“…அதற்கு நான்: இதோ, அடியேன் இருக்கிறேன், என்னை அனுப்பும் என்றேன்” (ஏசாயா 6:8).
2020ஆம் ஆண்டிற்குள் அடியெடுத்து வைத்திருக்கும் அனுதினமும் கிறிஸ்துவுடன் வாசகர்கள் யாவருக்கும் இனிய புத்தாண்டு வாழ்த்துக்களைத் தெரிவிக்கிறோம். தேவனுடைய சமாதானமும் கிருபையும் ஆசீர்வாதமும் உங்கள் குடும்பங்களில் நிறைந் திருக்க வாழ்த்துகிறோம் (ஆ-ர்).
வெகு சீக்கிரமாக ஒரு வருடத்தைக் கடந்து வந்துவிட்டோம். இந்த ஆண்டும் கடந்துவிடும். நமது, காலங்கள் கடந்தாலும் காலங்களையும் கடந்தவர் நம்முடன் இருக்கிறார் என்ற ஒரே நம்பிக்கைதான் நமக்கு பெலனாயிருக்கிறது. அந்தப் பெலனும் தைரியமும் நம்பிக்கையும் தரும் தேவனை இந்த முதல் நாளிலே மனதார ஸ்தோத்தரிப்போமாக. இந்த ஆண்டில் நமக்காக என்ன வைக்கப்பட்டுள்ளதை என்பதை நாம் அறியாவிட்டாலும், தேவனின் கரத்தில் நம்மை ஒப்படைப்பதே சிறந்தது.
முழுமனதுடன் செய்கின்ற ஒவ்வொரு சேவையையும் தேவன் பாராட்டுகிறார். இதற்கு பட்டம், பதவி அல்ல; உண்மையான இருதயம், அதாவது, தேவனுடைய பரிசுத்தத்திற்கு முன்னால், தான் பாவியென்பதை ஒப்புக்கொள்ளும் இருதயமே தேவை. தேவனுடைய மகிமையால் நிறைந்திருந்த தேவாலயத்தில், ‘சேனைகளின் கர்த்தர் பரிசுத்தர் பரிசுத்தர் பரிசுத்தர்’ என்று சேராபீன்கள் கூப்பிட்டுச் சொல்லி தேவனை ஆராதித்ததைக் கேட்ட ஏசாயா தன் இயலாமையை உணர்ந்தார். “ஐயோ! அதமானேன்” என்று கதறினார். அங்கேதானே அவருக்குத் தேவனுடைய பரிசுத்தமாக்குதல் கிடைத்தது. “யாரை அனுப்புவேன்” என்ற தேவனுடைய அங்கலாய்ப்பின் அழைப்பைக் கேட்க முடிந்தது. உடனடியாகவே, ‘இதோ, அடியேன் இருக்கிறேன்; என்னை அனுப்பும்’ என்று தன்னை ஒப்புக்கொடுத்தார் ஏசாயா.
இந்தப் புதிய ஆண்டின் இந்த முதல் நாளிலும் தேவனுடைய சத்தம் நமது செவிகளில் ஒலிக்கட்டும். நாட்கள் வெகு வேகமாகக் கடந்து செல்லுகிறது. இனிக் காலம் செல்லாது. புறப்பட்டுப்போய் சுவிசேஷத்தை அறிவிக்க, தேவனுக்காய் பணி செய்ய தேவன் அழைக்கின்ற சத்தம் கேட்கிறதா? இதற்கு பட்டம் பதவி அல்ல; உண்மையான மனந்திரும்புதல், அர்ப்பணிப்பு, கீழ்ப்படிதல், தேவனுடைய அன்பால் உடைந்த உள்ளம் இவைதான் தேவை. வேத அறிவு முக்கியம்; ஆனால் அதிலும் முக்கியம் உண்மையுள்ள இருதயம். ஆகவே, இந்த முதல் நாளிலேயே தேவனுக்காக நம்மை அர்ப்பணிப்போம்!
“தேவனே, நொறுங்குண்டதும் நருங்குண்டதுமான இருதயத்தை நீர் புறக்கணியீர்” (சங்.51:17).
ஜெபம்: கிருபையுள்ள ஆண்டவரே, இப்புதிய ஆண்டை எங்களுக்குத் தந்திருக்கிறீர் உம்மைத் துதிக்கிறோம். தேவ அழைப்பின் சத்தத்தைக் கேட்டு உடைந்த உள்ளத்தோடு உம்மிடம் திரும்புகிறோம், எங்களை ஏற்றுக் கொள்ளும். ஆமென்.
கிறிஸ்துவுக்குள் பிரியமுள்ள வாசகர்களுக்கு,
என் சமுகம் உனக்கு முன்பாகச் செல்லும் என்று வாக்குப்பண்ணின தேவாதி தேவனின் இனிய நாமத்தில் யாவருக்கும் இனிய புத்தாண்டு வாழ்த்துக்களைத் தெரிவிக்கிறோம்.
கர்த்தர் நம்மேல் வைத்த இரக்கத்தினாலே இன்னுமொரு புதிய ஆண்டிற்குள்ளாக நாம் பிரவேசிக்க அவர் உதவி செய்துள்ளார். வருஷத்தை நன்மையால் முடிசூட்டுகிற தேவன் இப்புதிய வருடத்தின் ஒவ்வொரு நாளையும் தம்முடைய வாக்குத்தத்தத்தின்படியே ஆசீர்வாதமாய் நடத்துவார். நமது அன்றாட வாழ்க்கைக்குரிய அனைத்து தேவைகளிலும் கர்த்தர் நம்மோடிருப்பார். ஆகவே, நாம் அனுபவிக்கிறதற்கு சகலவித நன்மைகளையும் நமக்குச் சம்பூரணமாய் கொடுக்கிற ஜீவனுள்ள தேவன்மேல் நம்பிக்கை வைத்து முன்னேறிச் செல்வோம். இப்புதிய ஆண்டிலே நன்மையும் கிருபையும் உங்களைத் தொடர வேண்டுதல் செய்கிறோம்.
2020ஆம் ஆண்டில் வேதவாசிப்பு அட்டவணைப்படி பரிசுத்த வேதாகமத்தை வாசித்து முடித்தவர்கள் ஜனவரி 31ஆம் தேதிக்குள் எங்களுக்கு எழுதித் தெரிவிக்க அன்பாய் கேட்கிறோம். கடந்த ஆண்டில் தங்கள் சந்தாவைப் புதுப்பிக்காதவர்களும் புதுப்பித்துக்கொண்டு இவ்வூழியத்தைத் தாங்க அன்புடன் நினைவூட்டுகிறோம். தாங்கள் பெற்றுக்கொண்ட ஆசீர்வாதங்களையும் கருத்துக்களையும் எங்களுக்கு எழுதித் தெரிவியுங்கள்.
ஜனவரி மாத தியானங்களை சகோதரி தர்ஷ்னி சேவியர் அவர்கள் புத்தாண்டுக்குள் பிரவேசித்திருக்கும் நம் ஒவ்வொருவரும் பிரயோஜனமடையும்படியாக தியானங்களை எழுதியுள்ளார்கள். பிப்ரவரி மாத தியானங்களை சகோதரி சாந்திபொன்னு அவர்கள் இரண்டாம் வருகைக்கு நாம் ஆயத்தமாகுபடியாக அருமையான தியானங்களை எழுதியுள்ளார்கள். இத்தியானங்கள் உங்கள் யாவருடைய ஆவிக்குரிய வாழ்விற்கும் பிரயோஜனமாயிருக்கும்படி வேண்டுதல் செய்கிறோம்.
கே.ப.ஆபிரகாம்
