கர்த்தரே ஆவியானவர்; கர்த்தருடைய ஆவி எங்கேயோ அங்கே விடுதலையுமுண்டு (2கொரி.3:17)
அவன் என்னை நோக்கிக் கூப்பிடுவான், நான் அவனுக்கு மறுஉத்தரவு அருளிச் செய்வேன் (சங். 91:15).
வேதவாசிப்பு: காலை: ஆதியாகமம் 1,2 | மாலை: மத்தேயு 1
தியானம்: 2023 ஜனவரி 1 ஞாயிறு | வேத வாசிப்பு: உபாகமம் 33:26-29
கர்த்தரால் ரட்சிக்கப்பட்ட ஜனமே, உனக்கு ஒப்பானவன் யார்? உனக்குச் சகாயஞ்செய்யும் கேடகமும் உனக்கு மகிமைபொருந்திய பட்டயமும் அவரே… (உபா.33:29).
வாசகர்கள் அனைவருக்கும் எமது இனிய புத்தாண்டு வாழ்த்துக்களைத் தெரிவிக்கிறோம். 2023ஆம் ஆண்டிற்குள்ளாக பிரவேசிக்க தேவன் நமக்கும் நமது குடும்பத்திற்கும் கிருபை செய்தபடியால் அவரைத் துதிப்போம். அவன் என்னை நோக்கிக் கூப்பிடுவான்; நான் அவனுக்கு மறுஉத்தரவு அருளி செய்வேன் என்ற வாக்கின்படி இந்த ஆண்டு முழுவதும் தேவன் உங்களுக்கு மறுஉத்தரவு அருளி ஆசீர்வதித்து வழிநடத்துவாராக!
பல இடர்களைத் தாண்டி ஒரு புதிய வருடத்துக்குள் ஜீவன் சுகம் பெலத்தோடு நம்மை நடத்திவந்தவர் கர்த்தர் ஒருவரே. அவரே தொடர்ந்தும் நடத்துவார். கடந்த சில ஆண்டுகள் முழு உலகமுமே பெரிய பயங்கரத்தைச் சந்தித்தது. எத்தனையோ பாதிப்புகள், பயங்கர நோய்த் தொற்றுகள், மரண ஓலங்கள், இழப்புகள், பெருக்கெடுத்த கண்ணீர்! பலரையும் இழந்த நிலை என நமது நம்பிக்கை தடுமாறினாலும், சூரியனோ, சந்திரனோ, நட்சத்திரமோ இன்னமும் மாறவில்லை. மனிதன் தான் வாழும் சூழலை மாசடையச் செய்தாலும், இன்னமும் சமுத்திர அலைகள் ஓயவில்லை; கடற்கரை மணலைத் தாண்டவில்லை. தேவசாயலில் படைக்கப்பட்ட மனிதன் பதறினாலும், சிருஷ்டி கர்த்தரோ மாறவேயில்லை. இனியும் அவரே நம்மை நிச்சயம் ஆதரிப்பார்.
கர்த்தருடைய கட்டளைப்படி இஸ்ரவேலை எகிப்திலிருந்து மீட்டு, கானானுக்கு நடத்தி வந்த மோசே, தனது முடிவு நெருங்கிவிட்டதை உணர்ந்தவராய், கடந்து வந்த பாதைகளை இஸ்ரவேலுக்கு விபரித்து, தான் மரணமடையுமுன்னே இஸ்ரவேல் புத்திரரை ஆசீர்வதித்தார் (உபாகமம் 33:1). இந்த இடத்தில் ஒரு நீண்ட பயணத்தின் ஒரு பகுதி முடிவுக்கு வருகிறது; அடுத்தது, ஆரம்பிக்கிறது. “கர்த்தரால் இரட்சிக்கப்பட்ட ஜனமே, உனக்கு ஒப்பானவன் யார்?” மோசேயின் இவ்வார்த்தைகள், மீதியுள்ள நமது பயணத்திற்கான உற்சாகமளிக்கும் வார்த்தைகள்! சென்றடைய வேண்டிய கானான் தேசத்தைக் குறித்த நிச்சயம்! நடந்தவற்றை மறந்து முன்னேறிச் செல்வதற்கான உந்துதல்! எகிப்திலிருந்து புறப்பட்டவர்களின் அடுத்த தலைமுறையினர் யோர்தானின் இக்கரையில் நிற்கையில், மோசே அவர்களை யோசுவாவிடம் கர்த்தருடைய கட்டளைப்படி கையளிக்கிறார். ஒரு புதிய சந்ததி; புதிய தலைமைத்துவம்; இதற்கு முன்னே நடக்காத ஒரு புதிய வழி; “அநாதி தேவனே உனக்கு அடைக்கலம்; அவருடைய நித்திய புயங்கள் உனக்கு ஆதாரம்” என்கிறார் மோசே.
முற்பிதாக்களுக்குச் செய்த வாக்குப்படி, முரட்டாட்டம், கீழ்ப்படியாமையின் மத்தியிலும் இஸ்ரவேலரைக் கைவிடாது தேவன் நடத்தினார். இன்று தமது ஒரே பேறான குமாரனின் இரத்தத்தினால் கிருபையாக இரட்சிக்கப்பட்ட நம்மை, பரம கானானை நோக்கி நடத்துகிறார். அவர் கைவிடமாட்டார். கர்த்தருடைய புயங்கள் எப்போதும் நம்மை நோக்கி நீண்டிருக்கிறது. அதற்குள் அடைக்கலம் புகுபவர்களை அவர் நிச்சயம் ஆதரிப்பார்.
ஜெபம்: எங்களுக்கு அடைக்கலமாயிருக்கிற உன்னதமான கர்த்தரே, இந்த புதிய ஆண்டில் நீர் எங்களுக்கு தாபரமாக இருந்து வழிநடத்த வேண்டுதல் செய்கிறோம். ஆமென்.
கிறிஸ்துவுக்குள் பிரியமுள்ள வாசகர்களுக்கு,
இம்மட்டும் நம்மோடிருந்து நம்மை வழிநடத்தின ஆண்டவருடைய நாமத்தினாலே அன்பின் புத்தாண்டு வாழ்த்துக்களைத் தெரிவித்துக் கொள்கிறோம்.
தேவனுடைய பெரிதான கிருபையாலும் இரக்கத்தாலும் 2022ஆம் வருடத்தை கடந்து புதிய வருடத்திற்குள் பிரவேசிக்க கர்த்தர் நமக்கு தயை செய்திருக்கிறார். கடந்திட்ட நாட்களில் எல்லாம் நம்மை வழுவாமல் பாதுகாத்து நம் தேவைகளையெல்லாம் சந்தித்து நிலைநிறுத்தின ஆண்டவருக்கு நன்றிபலிகளை ஏறெடுப்போம். அவன் என்னை நோக்கிக் கூப்பிடுவான், நான் அவனுக்கு மறுஉத்தரவு அருளிச் செய்வேன் (சங்.91:15) என்ற வாக்கை விசுவாசித்து முன்னேறிச் செல்வோம். இந்த புதிய ஆண்டிலே நாம் ஏறெடுக்கும் எல்லா விண்ணப்பங்களையும் கர்த்தர் கேட்டு நம் தேவைகள் அனைத்தையும் நிச்சயமாய் தேவன் சந்திப்பார்.
2023ஆம் வருட சத்திய வசன காலண்டரை பங்காளர்களுக்கு அனுப்பி வைத்துள்ளோம். கூடுதலான காலண்டர் தேவைப்படுபவர்கள் 7ஆம் பக்கத்திலுள்ள விளம்பரத்தைக் கவனிக்கவும். சத்தியவசன ஊழியத்தை கடந்த ஆண்டு முழுவதும் ஜெபத்தோடும் மனப்பூர்வமான காணிக்கையாலும் தாங்கி வந்த அன்பு பங்காளர்கள் ஆதரவாளர்கள் யாவருக்கும் நன்றி கூறுகிறோம். இப்புதிய ஆண்டிலும் தொடர்ந்து தங்களது மேலான ஆதரவைத் தர அன்பாய் கேட்கிறோம்.
தியான புத்தகத்தின் வேதவாசிப்பு அட்டவணையைப் பயன்படுத்தி 2022ஆம் ஆண்டில் பரிசுத்த வேதாகமத்தை வாசித்து முடித்தவர்கள் ஜனவரி 31ஆம் தேதிக்குள் எங்களுக்கு தெரியப்படுத்த அன்பாய் கேட்டுக்கொள்கிறோம். அடுத்த இதழில் உங்களது பெயர்கள் பிரசுரிக்கப்படும். இந்த ஆண்டிலும் அநேகர் வேதாகமத்தை ஒரு வருடத்திற்குள் வாசித்து முடிப்பதற்கு உற்சாகப்படுத்துகிறோம்.
இவ்விதழில் ஜனவரி மற்றும் பிப்ரவரி ஆகிய இரண்டு மாதங்களும் புதிய வருடத்தில் நாம் தியானித்து கிறிஸ்துவுக்குள் வளருகிறதற்கு உகுந்த தியானங்களை சகோதரி சாந்தி பொன்னு அவர்கள் எழுதியுள்ளார்கள். ஜெபத்தோடு தியானியுங்கள். தியானங்களை எழுதும் சகோதர, சகோதரிகளுக்காக ஜெபியுங்கள். இந்த தியானங்கள் தங்கள் ஆவிக்குரிய வாழ்விற்கு ஆசீர்வாதமாக அமைய வேண்டுதல் செய்கிறோம். கர்த்தரின் கிருபை உங்களனைவரோடும் கூட இருக்க ஜெபிக்கும்…
கே.ப.ஆபிரகாம்
