தேவன் அவரை மரித்தோரிலிருந்து எழுப்பினாரென்று உன் இருதயத்திலே விசுவாசித்தால் இரட்சிக்கப்படுவாய் (ரோமர் 109)
கர்த்தர் நித்தமும் உன்னை நடத்தி, மகா வறட்சியான காலங்களில் உன் ஆத்துமாவைத் திருப்தியாக்கி, உன் எலும்புகளை நிணமுள்ளதாக்குவார். …. வற்றாத நீருற்றைப்போலவும் இருப்பாய் (ஏசா. 58:11).
வேதவாசிப்பு: காலை: ஆதியாகமம் 1,2 மாலை: மத்தேயு 1
தியானம்: 2022 ஜனவரி 1 சனி | வேத வாசிப்பு: சங்கீதம் 46:1-11
உன்னதமானவராகிய கர்த்தர் பயங்கரமானவரும், பூமியின் மீதெங்கும் மகத்துவமான ராஜாவுமாயிருக்கிறார் (சங்.47:2).
சத்தியவசனம் பங்காளர்கள், வாசகர்கள், நேயர்கள் ஆதரவாளர்கள் அனை வருக்கும் எமது புத்தாண்டு வாழ்த்துக்களைத் தெரிவிக்கிறோம். தேவனுடைய கிருபையும் நன்மையும் ஆசீர்வாதமும் சுகமும் தங்களையும் தங்களது குடும்பத்தார் அனைவரையும் தொடருவதாக!
எல்லா விக்கினங்களிலிருந்தும் நம்மைப் பாதுகாத்து, இன்னுமொரு வருடத்தைக் காணும்படி வழிநடத்திவந்த தேவன் ஒருவருக்கே சகல கனமும் மகிமையும் என்றென்றும் உண்டாவதாக. கடந்தவருட கசப்பான அனுபவங்கள், எதிர்பாராத சம்பவங்கள், லட்சக்கணக்கான உயிரிழப்புகள், கண்ணீரில் மிதந்த குடும்பங்கள், முழு உலகமுமே ஆடிப்போகுமளவுக்கு முடிவு காணமுடியாத முடிச்சுக்கள் பல! இப்புதிய வருடத்தில், இந்த ஜீவனுள்ளோர் தேசத்தில் ஜீவனுள்ளோர் தொகையில் நாம் இன்னமும் ஜீவித்திருக்கிறோம் என்றால், அது ராஜாதி ராஜாவினுடைய சுத்த கிருபையே! கர்த்தரே ராஜா; சகலமும் அவர் கட்டுப்பாட்டிலேயே இருக்கிறது.
1இராஜா.18:13-19:37 பகுதியில், யூதாவின் ராஜாவாகிய எசேக்கியாவின் நாட்களிலே, அசீரியா ராஜா சனகெரிப்பினால் யூதாவுக்கு வந்த பயமுறுத்தல் காலப் பகுதியில்தான் இந்த 46ம், 47ம் சங்கீதங்கள் எழுதப்பட்டன என்று நம்பப்படுகிறது. அசீரியா யூதாவுக்கு எதிராக வந்தபோது, எசேக்கியா செய்தது இதுதான்: தன் வஸ்திரங்களைக் கிழித்து, இரட்டு உடுத்திக்கொண்டு கர்த்தருடைய ஆலயத்தில் பிரவேசித்தான். பின்னும், எதிரி அனுப்பிய நிருபத்தை வாங்கி வாசித்து விட்டு, கர்த்தரின் ஆலத்திற்குப் போய், அதைக் கர்த்தருக்கு முன்பாக விரித்து வைத்து ஜெபித்தான். கர்த்தர் அவனுக்கு அடைக்கலமும் பெலனும், ஆபத்துக் காலத்தில் அநுகூலமான துணையுமானார். நடந்தது என்ன? ஒரே இராத்திரியிலே அசீரியரின் இலட்சத்தெண்பத்தையாயிரம் பேர் சங்கரிக்கப்பட்டார்கள். எசேக்கியாவின் எதிரிகள், ஒரே ராத்திரியிலே மாண்டார்கள்.
அன்பானவர்களே, நமக்கு சஞ்சலம் ஏற்படுத்திய சத்துருவை நமது வெற்றுக் கண்களும் காணவில்லை. ஆனால், நமது “தேவன் என்றென்றைக்குமுள்ள சதா காலங்களிலும் நம்முடைய தேவன்; மரணபரியந்தம் நம்மை நடத்துவார்” (சங்.48:14). ஆகவே, மகத்துவமான ராஜாவை நோக்கித் திருப்புவோம்.இந்த ஆண்டில்கூட என்ன நடக்கும், யார் அறிவார்? ஆக, நமக்கு அடைக்கலமாயிருக்கும், சேனைகளின் கர்த்தரை மாத்திரமே பற்றிக்கொள்வோம். பல பொறுப்புகள் மத்தியில்தான் ஏனோக்கு தேவனோடு சஞ்சரித்தார். மனுஷருடைய அக்கிரமம் பூமியிலே பெருகிய காலத்தில் தான் நோவா தேவனோடு சஞ்சரித்தார். ஆகவே, எது நடந்தாலும்; எஞ்சியிருக்கிற நமது வாழ்நாட்களில் ஒவ்வொரு கணமும், தூக்கத்தில்கூட தேவனோடு இணைந்து வாழும் கிருபையைப் பெற்றுக்கொள்வோம். மகத்துவமானவர் நம்மோடிருக்கிறார்!
ஜெபம்: இந்த புதிய ஆண்டிற்குள் பிரவேசிக்க எனக்கு கிருபை செய்தீரே, உமக்கு ஸ்தோத்திரம். ஒருகணத்தில் யாவையும் மாற்றிப்போட வல்லவரும் மகத்துவமுமுள்ள ராஜாவாகிய உம்மையே சார்ந்திருக்க என்னை ஒப்புவிக்கிறேன். ஆமென்.
கிறிஸ்துவுக்குள் பிரியமுள்ள வாசகர்களுக்கு,
நேற்றும் இன்றும் என்றும் மாறாதவராயிருக்கிற ஆண்டவராகிய இயேசுகிறிஸ்துவின் இனிய நாமத்தில் அன்பின் புத்தாண்டு வாழ்த்துக்களைத் தெரிவித்துக்கொள்கிறோம்.
வருடத்தின் துவக்கத்தில் அனுதினமும் கிறிஸ்துவுடன் இதழின் வாயிலாக தங்களைச் சந்திக்க உதவி செய்த தேவாதிதேவனைத் துதிக்கிறோம். கடந்த வருடத்தில் எத்தனையோ நெருக்கங்களை கடந்து வந்திருக்கிறோம். இப்போதும் தேசத்தில் பல்வேறு அச்சுறுத்தல்களைக் கேள்விப்படுகிறோம். இந்த தேவன் என்றென்றைக்குமுள்ள சதாகாலங்களிலும் நம்முடைய தேவன்; மரணபரியந்தம் நம்மை நடத்துவார் (சங்.48:14) என்ற வாக்கை நாம் பற்றிக்கொள்வோம். வருங்காலங்கள் ஆசீர்வாதமானதாக இருக்க தேவன் அருள் புரிவார்.
கொரோனா தொற்றின் நிமித்தம் நடத்த இயலாமற் இருந்த அலுவலக ஜெபக்கூட்டம் 2021 நவம்பர் மாதத்திலிருந்து மீண்டும் துவங்க கர்த்தர் செய்தார். 2022ஆம் வருட சத்திய வசன காலண்டரை பங்காளர்களுக்கு அனுப்பிவைக்கிறோம். கடந்த ஆண்டு முழுவதும் சத்தியவசன ஊழியத்தை ஜெபத்தோடும் மனப்பூர்வமான காணிக்கையாலும் தாங்கி வந்த அன்பு பங்காளர்கள் ஆதரவாளர்கள் யாவருக்கும் நன்றி கூறுகிறோம். இப்புதிய ஆண்டிலும் தொடர்ந்து தங்களது மேலான ஆதரவைத் தர அன்பாய் கேட்கிறோம்.
தியான புத்தகத்தின் வேதவாசிப்பு அட்டவணையைப் பயன்படுத்தி 2021ஆம் ஆண்டில் பரிசுத்த வேதாகமத்தை வாசித்து முடித்தவர்கள் ஜனவரி 31ஆம் தேதிக்குள் எங்களுக்கு தெரியப்படுத்த அன்பாய் கேட்டுக்கொள்கிறோம். அடுத்த இதழில் உங்களது பெயர்கள் பிரசுரிக்கப்படும். இந்த ஆண்டிலும் அநேகர் வேதாகமத்தை ஒரு வருடத்திற்குள் வாசித்து முடிப்பதற்கு உற்சாகப்படுத்துகிறோம்.
இவ்விதழில் ஜனவரி மாதத்தில் 1-8 ஆகிய நாட்களில் சகோதரி சாந்தி பொன்னு அவர்கள் எழுதிய தியானங்களும், 9-31 வரை சகோதரி தர்ஷினி சேவியர் அவர்கள் எழுதிய தியானங்களும் இடம்பெற்றுள்ளன. பிப்ரவரி மாதத்தில் ஆபிரகாமின் வாழ்வி லிருந்து Dr.உட்ரோல் குரோல் அவர்கள் எழுதிய தியானங்கள் பிரசுரித்துள்ளோம். இந்த தியானங்கள் மறைந்த சகோதரர் வில்சன் அவர்களால் மொழிபெயர்க்கப்பட்டவை யாகும். இத்தியானங்களை எழுதிவருகிற சகோதர, சகோதரிகளைத் தொடர்ந்து உங்கள் ஜெபங்களில் தாங்க அன்பாய் கேட்கிறோம்.
கே.ப.ஆபிரகாம்
