வாக்குத்தத்தம்: 2022 செப்டம்பர் 1 வியாழன்
நாம் ஆவியினாலே பிழைத்திருந்தால், ஆவிக்கேற்றபடி நடக்கவும் கடவோம் (கலாத்தியர் 5:25).
நீரே அநாதியாய் என்றென்றைக்கும் தேவனாயிருக்கிறீர் (சங். 90:2).
வேதவாசிப்பு: காலை: சங்கீதம் 139-144 | மாலை: 1கொரிந்தியர் 11
கர்த்தரின் வார்த்தை நிறைவேறும்
தியானம்: 2022 செப்டம்பர் 1 வியாழன் | வேத வாசிப்பு: 2நாளாகமம் 36:10-20
எரேமியாவின் வாயினாலே கர்த்தர் சொன்ன வார்த்தை நிறைவேறும்படி… (எஸ்றா 1:1).
அன்பான அனுதினமும் கிறிஸ்துவுடன் வாசகர்களே, இப்புதிய மாதத்திற்குள் கடந்துவர தேவன் கிருபை செய்தபடியால் நம் தேவனைத் துதிப்போம். இந்த புதிய மாதத்திலும் நமது தேவைகள் அனைத்தையும் சந்தித்து நன்மையும் கிருபையும் நம்மைத் தொடர தேவன் கிருபை செய்வார். நீரே அநாதியாய் என்றென்றும் தேவனாயிருக்கிறீர் (சங்.90:2) என்ற வாக்கின்படி தேவன் என்றென்றும் நம்மோடிருந்து வழிநடத்துவார்.
காலாகாலமாக அநேக தேவனுடைய பிள்ளைகள் தமது வாயினாலே கர்த்தருடைய வார்த்தைகளை உரைக்கிறார்கள். அவற்றில் சில நிறைவேறுவதைக் காண்கிறோம். சில ஏன் நிறைவேறாமல் இருக்கின்றன என யோசிக்கிறோம். நிறைவேறாமல் போவதற்கு பல காரணங்கள் இருக்கலாம். சிலசமயம் மனிதருடைய கீழ்ப்படியாமையால் அவை நிறைவேறத் தாமதமாகலாம். சிலசமயம் தேவன் சொல்லாததையும் சிலர் சொல்லுவதற்கும் வாய்ப்புண்டு. எது எப்படியாயினும் நாம் ஒருபோதும் மறக்கக்கூடாத ஒருகாரியம் உண்டு. அது என்னவென்றால், தேவன் ஒன்று சொன்னால், அவர் தாம் சொன்னதைச் சொன்னபடியே நிச்சயம் நிறைவேற்றுவார். இது வேதசத்தியம்.
யூதேயாவின் கடைசி ராஜாவான சிதேக்கியா ராஜாவைக்குறித்து இன்று வாசித்தோம். இவன் காலத்துப் பிரச்சனை என்னவென்றால், ராஜா தன்னைத் தாழ்த்தவில்லை. ஆசாரியர்களும் ஜனங்களுங்கூடக் கர்த்தருக்கு விரோதமாக நடந்து, எருசலேமின் ஆலயத்தைத் தீட்டுப்படுத்தினார்கள். அதனால் அவர்கள் தேவனுடைய சகாயத்தை இழந்ததோடு, கல்தேயருடைய ராஜாவின் கைக்கும் ஒப்புக் கொடுக்கப்பட்டனர். தேசம் பாழானது. பட்டயத்திற்குத் தப்பினவர்கள் சிறைபட்டுப் போனார்கள். சிறைப்பட்டுப்போனவர்கள் பாபிலோனிலே எழுபது வருஷங்கள் இருந்தனர், இவையாவும் எரேமியாவின் வாயினால் ஏற்கனவே உரைக்கப்பட்டதாக இருக்கிறது (எரே.25:1-11). ஆனால் கர்த்தர், இத்துடன் நிறுத்திவிடவில்லை. அந்த எழுபது வருஷங்கள் முடிந்தபின் என்ன நடக்கும் என்பதையும் எரேமியா மூலம் சொல்லி வைத்திருந்தார் (எரே. 29:4-15).
“எழுபது வருஷம் முடிந்த பின்னர் அவர்களைச் சந்தித்து, திரும்பவும் யூதாவுக்கு வரப்பண்ணுவேன்” என்று கர்த்தர் சொல்லியிருந்தார். அப்படியே பாபிலோன் தள்ளப்பட்டு, பெர்சியா ராஜ்யபாரத்தை ஸ்தாபித்த காலத்தில் யூதருக்கு அந்த எழுபது வருஷம் முடிவுக்கு வந்தது. ராஜ்யபாரங்கள் மாறும். ஆனால் கர்த்தருடைய வாக்கு ஒருபோதும் மாறாது. எரேமியா மூலம் கர்த்தர் உரைத்தபடி எழுபது வருஷம் முடிவுக்கு வந்ததும், கர்த்தர் தமது அடுத்த நடபடிக்கையை முன்னெடுக்கவும், தாம் உரைத்தபடியே கோரேஸ் ராஜாவோடு இடைப்பட்டார்.
பிரியமானவர்களே, தேவன் நமக்கு ஒரு வார்த்தையை அருளினால் நாம் அதை முழுமனதோடு நம்பவேண்டும். அது நிறைவேறக் காத்திருக்கவேண்டும். அவ்விதம் காத்திருக்கச் செய்வதற்கும் ஒரு காரணம் இருக்கும். ஆனால், அவர் சொன்ன தமது நல் வார்த்தைகளைக் கட்டாயம் செய்து முடிப்பார்.
ஜெபம்: அன்பின் தேவனே, நீர் சொன்னதைச் செய்வதில் தாமதம் ஏற்பட்டாலும் அதை எனக்கு செய்துமுடிப்பீர் என்ற நம்பிக்கையை இன்று தந்தபடியால் ஸ்தோத்திரம். ஆமென்.
ஆசிரியரிடமிருந்து… (செப்டம்பர் – அக்டோபர் 2022)
கிறிஸ்துவுக்குள் பிரியமுள்ள வாசகர்களுக்கு,
இராஜாதி இராஜாவாக சீக்கிரம் வரப்போகும் இயேசுகிறிஸ்துவின் இனிய நாமத்தில் அன்பின் வாழ்த்துக்களைத் தெரிவித்துக் கொள்கிறோம்.
இவ்வருடத்தில் இந்நாள் வரை நம்மை வழிநடத்தி வந்த தேவனை ஸ்தோத்திரிப்போம். இந்த இதழ் அநேகருடைய ஆவிக்குரிய வாழ்க்கைக்கு ஆசீர்வாதமாக இருக்க தேவனிடத்தில் மன்றாடுகிறோம். இத்தியானங்கள் வாயிலாக தங்கள் வாழ்க்கையிலே அநேகர் நல்ல தீர்மானங்களை எடுக்கவும் ஆவிக்குரிய வளர்ச்சி அடைந்து வருவதையும் அறிந்து தேவனைத் துதிக்கிறோம். தியானங்களினாலே ஆசீர்வாத நன்மைகளைப் பெற்றவர்கள் எங்களோடு பகிர்ந்துகொள்ளவும் அநேகருக்கு இவ்விதழை அறிமுகப்படுத்தி வைக்கவும் அன்பாய் வேண்டுகிறோம்.
சத்தியவசன தொலைகாட்சி நிகழ்ச்சி வாயிலாகவும் அநேகரை சந்திக்க தேவன் கிருபை செய்துவருகிறார். இந்நிகழ்ச்சிகள் தடைகளின்றி நடைபெறுவதற்கு தொலை காட்சி ஆதரவாளர் திட்டத்தில் இணைந்து தாங்க அன்பாய் கேட்கிறோம். YouTube Channel இல் இடம்பெற்றுள்ள தியானங்கள் (Audio Version) மற்றும் தெலைகாட்சி நிகழ்ச்சிகள் ஆகியவற்றின் வாயிலாகவும் ஆசீர்வாதமடைய அழைக்கிறோம்.
சத்தியவசன வானொலி மற்றும் தொலைகாட்சி நிகழ்ச்சிகளில் இடம்பெற்ற செய்திகளடங்கிய புத்தக வெளியீடுகளை மறுபதிப்பு செய்துவருகிறோம். இப்பணிக்கான தேவைகள் அனைத்தும் சந்திக்கப்பட வேண்டுதல் செய்யவும். தேவன் உங்களை ஏவுவாரானால் மனமுவந்து இப்பணிகளைத் தாங்கவும் அன்பாய் கேட்கிறோம்.
இவ்விதழில் செப்டம்பர் மாத தியானங்களை சகோதரி ஜேனட் அவர்கள் எஸ்றா புஸ்தகத்திலிருந்தும், அக்டோபர் மாதத்தில் சகோ.தர்மகுல சிங்கம் அவர்கள் பல்வேறு தலைப்புகளிலும் அநேக ஆவிக்குரிய சத்தியங்களை எழுதியுள்ளார்கள். நம்மை ஜீவ பாதையில் வழிநடத்திச் செல்ல இத்தியானங்கள் அதிக ஆசீர்வாதமாக இருக்கும் என்பதில் சந்தேகமில்லை. அனுதினமும் கிறிஸ்துவுடன் தியானங்களை எழுதுகிற தேவ பிள்ளைகளுக்காக ஜெபிக்க மறவாதீர்கள். பல்லாயிரக்கணக்கான மக்களுக்கு தேவன் அவர்களை ஆசீர்வாதமாக உபயோகிக்க நல்ல சுகம் பெலன் ஆரோக்கியத்தைத் தந்து, காத்து வழிநடத்தவும் வேண்டுதல் செய்வோம்.
கே.ப.ஆபிரகாம்
